Får endeleg øve saman igjen
Dei har ikkje sett kvarandre på eit halvt år. No rekk dei akkurat å få friska opp «Ja, vi elsker».
Samtidig som barn og unge vart sendt utandørs for å øve, fekk vaksne i Bergen endeleg møtast igjen etter over fem månader med forbod.
– For mange av oss er det den kjekkaste hobbyen vi har. Det er veldig kjekt å få drive med han igjen etter nesten eit halvt år utan.
Det seier Didrik Nygaard i Skjold Nesttun janitsjar.
– Eg vart overraska
Nygaard troppa spent opp på første øving. For korleis kjem det til å høyrest ut når 30 personar som knapt har tatt i eit instrument sidan før jul, skal spele igjen? Og attpåtil i same rom?
Resultatet overraska styreleiaren.
– Det var faktisk overraskande god klang. Vi var mange som vart overraska. Korpset vårt er vanlegvis kjend for god klang. At vi har klart å ta vare på han i ein så lang periode utan øving, er kjekt å høyre.
Ein faktor kan likevel ha påverka resultatet positivt, innrømmer Nygaard.
– At vi var berre 30 og ikkje 50 personar som vi plar. Jo fleire musikantar, desto meir skal klaffe. Så litt heldige kan vi ha vore, seier han og ler.
Korpskondis
Sjølv om korpset no har jobba seg opp i marsjhøgd i tide til 17. mai, vert det lite marsjering på nasjonaldagen.
– Vi skal stort sett stå i ro og spele i år. Elles hadde det vore behov for ei oppfrisking. Å spele og gå samtidig er ei eiga øvingsgrein.
Sjølv spelar han slagverk, og er ikkje så nervøs for at forma ikkje skal halde på den store dagen. Men for korpskollegaene som speler blåseinstrument, er det noko anna. Å gå frå ikkje å spele til å plutseleg øve tre timar i strekk, er ikkje berre, berre.
– For dei som brukar tunga og leppene aktivt i spelinga er det tungt å kome i gang. Vi har måtta starte forsiktig.
Det var faktisk overraskande god klang. Didrik Nygaard i Skjold Nesttun janitsjar
Ikkje uroa for 17. mai
Både korpsinteresserte og andre heldt pusten då det naerma seg mai og korps framleis ikkje fekk lov å øve i lag. Mange var uroa for at 17. mai måtte gå av stabelen utan korpsmusikk. Sjølv var ikkje Nygaard like uroleg.
– 17. mai-programmet er noko vi kan. Vi er eit førstedivisjonskorps, så det held med to-tre øvingar i forkant.
Ein nasjonaldag utan korpsmusikk, veit han ikkje korleis hadde blitt.
– Det hadde vore spennande. Vi trudde jo ikkje vi fekk spele i fjor heller, men vi er villige til å strekke oss langt for å få det til.
– Hadde de spelt i år viss de ikkje fekk øvd i forkant?
– Det hadde ikkje vorte same klangen. Men kan hende stemninga og gjensynsgleda hadde vege opp for det.