«Kampen» Barneroman Det Norske Samlaget

ANMELDT BOK Geir Egil Eiksund ♥♥♥♥

ANDREAS SIT UNDER eika og teiknar ei borg med bogeskyttarar. Mamma ropar frå kjøkkenvindauget, om fotballtrening, orgeløving og pizzakveld. Straks er det sommarferie. Sara sender meldingar med hjarte, laget er Liverpool og livet er godt. Så rullar ein mørk bil inn i forteljinga. I baksetet sit ein lys gut. Han heiter Viljar.

«Kampen» er ein varm og omsorgsfull barneroman om å vere 11 år og bli forelska, for første gong. Debutant Geir Egil Eiksund imponerer først og fremst ved eit gjennomgåande truverdig og autentisk barneperspektiv i forteljarstemma. Den overveldande forelskinga og den lammande katastrofen når alt vert oppdaga er skildra slik at ein kjenner det i kroppen.

AT FORTELJARSTEMMA FUNGERER SÅ GODT verkar også inn på framstillinga i sin heilskap. I språk og stil er «Kampen» fint tilpassa målgruppa si med ein venleg og varm grunntone. Det er som om boka vender seg mot lesaren sin med ei utstrekt hand: Alt blir bra.

Ein tydeleg bodskap, og dertil uttalt motivasjon for å skrive denne boka, er knytt til forfattarens eigen oppvekst som homofil på bygda. Langt på veg er nok erfaringane ein styrke for den litteraere framstillinga, men det å halde seg så tydeleg til håpet, venskapen og kjaerleiken som retning gjennom forteljinga, har sine slagsider.

NÅR SYMBOLTUNGE LYDSPOR og bibelord slår følgje mot forløysing og ny harmoni, er det naerliggande å innvende at mørket og uroa vert for lite og for lettvint utforska i denne boka.