Matilde (17) har hatt sin aller første eksamen
Nokre har pugga som galne, andre har tatt det med knusande ro.
– Det er ganske frigjerande. Tolv år med matte, og no er eg endeleg heilt ferdig, fortel Matilde Grønneland.
17-åringen står utanfor Årstad vidaregåande skule og har nett levert eksamen i P-matte.
I tillegg til å lese heile langhelga og søndag kveld, tok ho ein ekstra kikk i boka måndag morgon.
– Eg var ganske stressa då eg kom inn til eksamen, men etter kvart fann eg roa. Eg trur det gjekk greitt.
No er ho ferdig med sin aller første eksamen i livet.
– Eg har ikkje vore så mykje i sola i det siste.
Teknisk feil ramma titusenvis
For Grønneland gjekk det meste etter planen, men slik har det ikkje vore for alle. Måndag fekk elevar over heile landet ein trøblete start på eksamen i norsk hovudmål.
Ein av dei var Erik-Sebastian Reuss Haaland (19), som òg er elev på Årstad.
– Vi sat berre i fullstendig stille i ein time. Av og til høyrde eg eit host. Elles var det heilt knyst, fortel Haaland.
Tysdag har Haaland hatt sin andre eksamen, i P-matte. Det har ikkje stressa han så veldig.
– Eg trur det gjekk forferdeleg dårleg, men eg er nøgd så lenge eg står, seier 19-åringen.
Venninna Malena Aass (18) fortel at det var skummelt å ha eksamen for første gong.
– Eg var litt redd. Du veit ikkje kva du går til.
– Stressar for mykje
Ho hadde førebudd seg ved å sjå gjennom læreboka, men har ikkje pugga frå soloppgang til solnedgang.
– Eg synest det er mange på vår alder som stressar litt for mykje. Eg var perfeksjonist før, men no har eg lært meg å ta det litt meir med ro.
Dette er det vi veit om eksamensproblema denne veka:
1. Kva gjekk gale?
Då elevane skulle logge seg på for å ta eksamen 09.00 måndag morgon var det mange som ikkje fekk logga seg inn.
Etter omtrent ein time var feilen retta, og eksamen gjekk då som vanleg. Elevane som måtte vente, fekk lagt til ekstra tid å gjennomføre på.
2. Kor mange blei ramma?
Ifølgje VG var det rundt 70.000 elevar som skulle ta eksamen denne dagen. Berre 16.000 fekk logga seg på klokka 09.00.
3. Kva konsekvensar får det?
I Møre og Romsdal gjorde lokale problem med nettverket til at eksamen ikkje kunne gjennomførast. Deira eksamen blei avlyst, og dei får dispensasjon for dette på vitnemålet. I Viken har 397 elevar søkt om det same.
I Vestland har førebels ingen søkt om annullering av måndagens eksamen.
4. Korleis blir dei andre eksamenane gjennomført?
Feilen skal vere retta, og resten av eksamenane går som planlagt.
Tidlegare har Utdanningsdirektoratet sagt at dei ikkje vil skrive ut papirkopiar av eksamen som ei naudløysing.
I ei utgreiing til Kunnskapsdepartementet onsdag skreiv dei at dei no opnar for at skulane kan skrive ut papirkopiar til å ha i bakhand.
No er eg endeleg heilt ferdig. Matilde Grønneland (17), skoleelev