Dette meiner dei bør gjerast for å unngå fyllebråk på 17. mai
Ønskjer tilbod for dei mindreårige på ettermiddagen.
– Dei fleste på vår alder tenker at på 17. mai er det greitt å skeie heilt ut.
Det seier sytten år gamle Viljar Fonneland Jørgensen.
Etter nasjonaldagen var det mange som reagerte på ekstreme mengder fyllebråk, og fulle, unge menneske i bybiletet, midt på lyse dagen. BT har møtt fire ungdommar på Amalie Skram videregående skole, for å høyre kva dei tenker.
Burde vere greitt å drikke
– Eg synest ein burde klare å kombinere både fest og feiring av nasjonaldagen på ein god måte, seier Ada Amalie Skjensvold (19).
Ho trur ikkje løysinga på problemet er å vente med å opne tappekranene, slik nokre har foreslått.
– På 17. mai er det dagsfylla som gjeld, det er ein del av kulturen. Om ein ikkje kan kjøpe øl ute kjem folk til å kjøpe på førehand uansett.
– Men det er trist om vi gjer nasjonaldagen til noko negativt, seier Jørgensen.
Hovudproblemet er dei mindreårige som drikk, meiner Skjensvold.
– Dei veit ofte ikkje korleis dei skal ta vare på vennane sine viss dei skeier ut. Dessutan tør dei kanskje ikkje å ringe til foreldra sine.
Ho trur dei fleste på hennar alder tar ansvar viss nokon blir overstadig rusa.
– For naive
Fleire vaksne har vore ute i både sosiale medium og i media og uttrykt skuffelse og sjokk over tilstandane i sentrum på ettermiddagen.
Samstundes meldte politiet at dei hadde problem med å få foreldre til å kome og hente ungane sine på nasjonaldagen.
Politioverbetjent Ole Bjørn Sveen har tidlegare sagt til BT at dei aldri før har sett så mange unge, rusa menneske i sentrumskjernen.
Alkohol og narkotika
– Fyllet byrja ved 16-tida, og politiet registrerte for det meste unge gutar i alderen 15–20 år. Nokre var rusa på alkohol, andre på narkotika eller begge deler, sa Sveen då.