Bir får millionar til klimateknologi
Birs anlegg har det største klimautsleppet i Bergen. No får renovasjonsselskapet statsstøtte gjennom Enova til å gjera noko med det.
Dette var ei svært gledeleg melding å få. Eg håpar det blir den første av fleire. Borghild Lekve, direktør i Bir
– Dette var ei svært gledeleg melding å få. Eg håpar det blir den første av fleire, seier Borghild Lekve.
Ho er direktør i Bir. Måndag vart det kjent at selskapet får 28,5 millionar kroner til eit såkalla forstudie for karbonfangst ved bosbrenningsanlegget i Rådalen.
Bir har tidlegare sagt at heile prosjektet vil kosta rundt ein milliard kroner.
Lekve seier Enova-støtta skal gå til vidare arbeid med teknologi og klargjering av tomt.
Jobbar med finansiering
– Og så jobbar vi vidare med å få til finansieringa av anlegget, seier Lekve.
Målet er framleis å ha karbonfangstanlegget i drift innan 2030. Då skal det etter planen fanga 100.000 tonn CO₂ i Rådalen.
Karbondioksiden frå bergensbosset skal så fraktast til Northern Lights i Øygarden, for permanent lagring under havbotnen i Nordsjøen.
– Vi satsar på å bruka kjend teknologi, og å byggja i modular, slik at det seinare kan utvidast.
Kritisk til ny avgift
Dei samla utsleppa av CO₂ i Rådalen er rundt 240.000 tonn. 100.000 tonn er den delen av utsleppa som kjem får fossile kjelder, i all hovudsak plast som ikkje er sortert ut.
Denne delen av utsleppa fekk frå nyttår ei kraftig statleg avgift. Denne avgifta fell bort om klimagassen vert fanga og lagra.
– Vi har vore svært kritiske til ei slik avgift. Den reduserer vårt spelerom og mogelegheiter til å investera i karbonfangst, seier Lekve.
Ho meiner avgifta i det minste burde vore øyremerkt til miljøtiltak.
Stortinget har også etter ei rekkje innspel frå renovasjonsnæringa, bedt regjeringa om å greia ut konsekvensane av denne avgifta.
Enova støttar vanlegvis prosjekt som har kome langt, og som er nær ei investeringsavgjerd.
– Naudsynt utvikling
– I denne runden gir Enova støtte til banebrytande prosjekt som kan framskunda karbonfangst som klimaløysing, skriv statsselskapet i ei pressemelding.
Enova skriv at dei går inn med støtte på eit tidlegare tidspunkt enn vanleg. Dei har tildelt pengar til åtte aktørar fordelt på ni prosjekt, til ein samla sum på 198,4 millionar kroner. Og Bir får altså 28,5 millionar av desse støttekronene.
– Forstudiane som no får støtte har eit potensial for utsleppskutt som svarar til det dobbelte av Oslos totale CO₂utslepp årleg. Vi har med andre ord god tru på at tildelingane vil auka farten på den naudsynte utviklinga av karbonfangst i Noreg.
Dette seier administrerande direktør i Enova, Nils Kristian Nakstad, i pressemeldinga.
Enova fekk totalt 18 søknadar i denne utlysinga med totalt søkt støtte på over 400 millionar kroner.