Morten Myksvoll

INGVILD KJERKOL MÅTTE GÅ av som helseminister. Det var konklusjonen til statsminister Jonas Gahr Støre (Ap), som han delte med pressa fredag. Tidlegare har Støre glimra med sitt fråvær når statsrådar har gått av etter skandalar.

DET SISTE ÅRET har Anette Trettebergstuen (Ap), Ola Borten Moe (Sp) og Sandra Borch (Sp) gått av utan Støre ved si side.

SIDAN PRESSA VART INVITERT til Statsministerens kontor, trudde eg at Støre ville forsvare Kjerkol. Men han sende henne på dør.

– Eg har kome fram til at Kjerkol bør gå av som statsråd, sa Støre.

Det er sjølvsagt mogeleg at Støre berre var med på pressekonferansen fordi Kjerkol ikkje ville gå frivillig. Hennar defensive framferd på pressekonferansen kan tyde på det.

Kjerkol brukte pressekonferansen til å angripe pressa og forsvare masteroppgåva si. Ho opnar for å klage på vedtaket.

Dei tre andre statsrådane gjekk tilsynelatande av egen fri vilje.

UANSETT: HAN STILTE OPP for statsråden som fekk sparken. Det var godt å sjå.

Men pressekonferansen gjorde det vanskeleg å vite om dette var eit utslag av god eller tilfeldig leiarskap.

For på spørsmål om kvifor han stilte opp for Kjerkol og ikkje dei andre, svarte han dette:

«Det kjentes riktig nå.»

Det går an å håpe på dette ikkje berre var eit innfall. At Støre vil stille opp for neste statsråd som må gå.

For ein statsminister klarer uansett ikkje å distansere seg frå skandaliserte statsrådar ved å la dei stå åleine.

DET ER STØRE som definerer om statsrådane har tillit, sjølv om han til ein viss grad har sett konklusjonen ut til Nord universitet. Då må han stille opp.

DET GÅR AN Å HÅPE for Støres del at det ikkje kjem fleire slike avgangar i hans regjeringstid. Men skulle det skje, er fredagens pressekonferanse ein slags mal.

Der var han tydeleg på kvifor Kjerkol ikkje kunne halde fram som statsråd. Masterjukset til Kjerkol var ikkje i samsvar med å vere helseminister.

Det viser styrke å stå saman med den avgåande statsråden og seie at tilliten er borte.

STØRE STÅR FRAM som ein langt betre leiar i dag, enn då han var svært hard mot Trettebergstuen etter hennar avgang i fjor.

Trettebergstuens habilitetsfeil var knytt til jobben som statsråd. Det same kan ein seie om Moes aksjekjøp. Kjerkols og Borchs avgangar skuldast juks frå tida før dei blei statsrådar.

Det viser berre at tillitsbrotet kan skje før tilliten som statsråd er gitt.

SAKENE TIL KJERKOL OG BORCH er vanskelege for Støre å skjerme seg frå.

For kvar ny skandale blir nok lista for kva han går gjennom med nye statsrådar lenger og meir detaljert – men det er umogeleg å fange opp alt som kan vere problematisk i fortida til folk.

Kven tenkte på mastergradar som skandalemateriale for få år sidan?

SLIKE SKANDALAR gjer det vanskelegare for oss som følgjer med òg. For kvar ny avsløring, er det lett å tenkje «har dei ikkje lært?».

Borchs feil er ti år gammal. Kjerkol juksa på masteroppgåva i 2021. Dei kan ikkje ha lært av skandalane som er rulla opp etter feilen deira er gjort.

FOR Å BYGGE OPP ATT tilliten til politikarane – eller regjeringsprosjektet sitt, må han vere til stades.

Og han må vere tydeleg på kvar grensa går.

Slik sett kan Kjerkols lite audmjuke framferd ha vore ein siste innsats som statsråd for Støre. Ho fekk han til å sjå bra ut.

Pressekonferansen gjorde det vanskeleg å vite om dette var eit utslag av god eller tilfeldig leiarskap.