Olavsrosa skal henge i Sølvgarden
Inger og Trygve Rysstad på Sølvgarden har fått Olavsrosa for framifrå kulturarbeid innan sylvsmedfaget.
– Sjølvsagt er me stolte, seier Trygve Rysstad.
I grunngjevinga frå Norsk Kulturarv heiter det:
«Sølvgarden på Rysstad får Olavsrosa for handlingsboren vidareføring av sylvsmedtradisjonen i Sylvsmia». – Me har over 200 smedar i slekta, eg og Inger, seier Trygve Rysstad, som ser fram til den store festmiddagen 27. juni.
Då kjem leiar i kulturkomiteen på Stortinget, Svein Harberg, og representantar frå Norsk Kulturarv for å dele ut Olavsrosa.
Olavsrosa er det leiande varemerket for opplevingstilbod med basis i den norske kulturarven.
Det er berre fire andre verksemder på Sørlandet som har fått utmerkinga.
Dei er Heddan Gard i Hæbebostad, Det lille hotel i Risør, Damskipet Bjoren og Setesdalsbanen.
Nå blir Sølvgarden den 120. reiselivsverksemda i landet som får rosa. Det meiner Leonhard Jansen ved Setesdalsmuseet er særleg fortent.
– Trygve Rysstad er åttande generasjon smed og tredje generasjon sylvsmed. I Sølvgarden ligg sylvsmia og verkstaden som ein integrert del som turistane kan sjå på, seier Jansen.
Trygve Rysstad starte med sylv i tiårsalderen. Sylv var noko alle i huset kunne drive med, og før var det vanleg at borna jobba mykje saman med dei vaksne i sylvsmia.
På Rysstadmo har det budd smedar i over tusen år. På 1800-talet tok sylvsmed-tradisjonen med filigranssylv verkeleg av, men det har blitt laga sylv på Rysstad i minst 300 år.
– Allstøtt har folket på Rysstad drive mangesysling for å få skrapa saman ei inntekt. Difor var det vanleg at heile familien dreiv med sylv i saman med gardsdrift eller vanleg smie – akkurat slik ekteparet Rysstad nå driv med både reiseliv og sylv, seier Jansen.