Skal Fyresdal ofrast for Evje?
I vedtak om revidert statsbudsjett før sommerferien fekk regjeringa med seg KRF og Venstre på å legge ned dei opne soningsplassane i Fyresdal når utbygginga i Evje og Froland er ferdig i 2022.
●● Det logiske i si tid hadde sjølvsagt vore at Evje hadde fått heile den nye fengselsutbygginga på Sørlandet, både miljøomsyn for fangane og distriktomsyn hadde tent på det. Men ei svært tvilsam «fagleg» utgreiing slo fast at nye fengsel måtte ligge langs E 18. Einaste argument for dette syn- te seg å vere at det var upraktisk å frakte fangar lange strekningar til rettssaker i Arendal og Kristiansand.
Ordføraren i Evje og Hornnes, Bjørn Ropstad, slo alt i 2013 fast at dette enkelt måtte kunne ordnast med nokre få varetektsplassar på politihusa. Men sentraliseringskreftene var for sterke også på dette samfunnsområdet.
Som ein kompensasjon skulle så Evje få 40 nye opne fengselsplassar, men då måtte ein legge ned dei 28 plassane i Fyresdal! Særleg Høgres Solveig Sundbø Abrahamsen har dei siste to åra dokumentert at dette fengselet har hatt gode resultat og rimeleg drift gjennom alle år, men måtte i vår bøye seg for partipisken på Stortinget. For å berge fengselet i Fyresdal, er det no viktig at saka blir framheva i valkampen.
Aust-agders stortingsrepresentant (og 2.nestleiar i justiskomitéen), Kjell Ingolf Ropstad, kan som ny nestleiar i KRF bøte på uretten som er gjort, han kan få partiet med på å vurdere Fyresdal fengsel på nytt. Dette vil ikkje gå ut over Evje eller Froland - samfunnet har god bruk for alle plassane - men det kan syne at politikarane ikkje vil ofre ein liten utkantkommune for ein litt større.