Bygger ut 300 nye senger i Setesdals fjellheim
På Hovden Fjellstoge skal gamle hytter bort og det skal investerast for 250 millionar i nye hytter og leiligheter.
– Dette vil opne heilt nye marknader for oss. Vi er lite inne i forretningsmarknaden i dag, og har berre åtte vanlege hotellrom, seier Ann-torill Briksdal som driv Hovden Fjellstoge saman med ektemannen Roy Bakke.
Dei to overtok drifta av Hovden Fjellstoge i 2010, og nå har utbygginga i området rundt starta opp. På sikt skal det byggast ut for 250 millionar. Dei gamle hyttene skal sanerast og erstattast med nye hytter og leiligheter.
Halvparten vert selt som vanlege hytter, medan resten vert næring. Det vil innebere mellom 300 – 350 nye gjestesenger på Hovden Fjellstoge. Dei fleste i leiligheter.
– Det er mange senger på Hovden i dag, men det er kanskje ikkje dei rette type senger. Mykje dreiar seg om å tilby rett type overnatting, seier Roy Bakke.
LANGSIKTIG MÅL
Hovden Fjellstoge vart kjøpt opp av investor Tore Gustav Drivenes i 2007. Drifta er samla i eit eige selskap som Drivenes eig samen med Ann-torill Briksdal og Roy Bakke.
– Vi hadde ikkje nokon plan om å flytte til Hovden, men så fekk vi sjansen til å få vere med å utvikle dette prosjektet. Då bestemte vi oss for å flytte, seier Ann-torill Briksdal.
Dei to har begge bakgrunn innan reiseliv og har hatt ulike jobbar i Kristiansand og Oslo.
Hovden Fjellstoge omfattar i dag også drifta av kafèen Stump & Vatn i Hovden sentrum, friluftsområdet Hegni og igloar med matservering vinterstid. Verksemda omsette for ti millionar i 2016. Inntektene er like store i vintersesongen som i sommarsesongen, sjølv om Hovden ikkje har markert seg som sommardesitnasjon på same måte som til dømes Gol og Trysil.
– Vi må ikkje undervurdere dei omgjevnadene vi bur i. Det å kunne gå der ein vil og puste i frisk luft er ein stor kvalitet for mange, seier Roy Bakke.
NYE SENGER
Planane for Hovden Fjellstoge går tilbake til 2007. Nå er første byggetrinn i gang og det skal byggast 13 hytter som skal selgast til private.
– Dette er ein indrefilet. Du er tett inn på villmarka og det skal ikkje byggast noko anna i dette området. Nærmaste nabo her er naturreservat, seier Ann-torill Briksdal.
Detaljreguleringa for området vart vedteken av kommunestyret i Bykle like før sommaren. Totalt vert det opna for å bygge 154 nye einingar fordelt på 32 bygg.