Dei er ikkje så farlege som du trur
Eg har budd i ein by i snart ti år no, og eg ser dei nesten kvar einaste dag. Er det dagar eg ikkje ser dei, så er det nok berre fordi eg ikkje legg merke til dei svært unormale vanane dei har:
●● Dei sit på kafé, går på kino, spe- lar i band, går i kyrkja, er på turar, drikk øl, studerer og jobbar – ja, eg jobbar faktisk med ein, og han liknar ganske mykje på meg og deg.
Skeive Sørlandsdager vert arrangert denne veka. Ni av 32 ordførarar i Agder ynskjer ikkje å heise regnbogeflagget i sin kommune. Seks av dei er Krf-ordførarar.
Som den einaste Ap-ordføraren på Sørlandet, er Steinar Kyrvestad i Valle også ein av dei som ikkje ynskjer flagget med dei seks fargane velkomen til bygda. Han begrunner avgjersla med flaggreglar, og seier dette til avisa Fædrelandsvennen: ”Som ordfører kan vi ikke ha en praksis der en hvilken som helst organisasjon kan forvente å få heist sitt flagg”.
Det er synd. Flagget symboliserer fellesskap, samt Hallvard og Ingebjørg (evt. Ola og Kari) si fridom til å velje eiga legning, seksualitet og kjærleik. Det handlar ikkje om organisasjonar og logoar, eller om sal og markedskrefter. Det handlar om verdiar og eit symbol på å vere fri.
Det er dårleg med statistikk på kor mange homofile, lesbiske, bifile og transpersonar som lev i Noreg i dag. Statistisk sentralbyrå kom fram til 1,2 prosent av befolkninga etter ei undersøking i 2008. NRK melde om 3,3 prosent, organisasjonen FRI seier talet er ein stad mellom 3 til 5 prosent av befolkninga.
Tar ein utgangspunkt i innbyggjartalet til Valle kommune i 2016, utgjer dette ein plass mellom 10 til 60 personar. Eg har sjølv budd i bygda, og gjekk heile grunnskulen i Valle. Eg var aldri særleg interessert i snøscooterar eller anleggsmaskiner. Eg likte teoretiske fag og var glad i idrett og musikk.
Det å skilje seg ut kjem mykje tydelegare fram i ei lita bygd, samanlika med ein stor by. Derfor er det viktig å vise toleranse og aksept, uansett om det gjeld kultur, religion eller legning.
Då må i alle fall kommunen gå fram med eit godt eksempel, slik at bygdedyret ikkje et seg god og mett på menn som likar menn, og folk som er fanga i feil kropp. Særleg når SSB skriv at homofile og lesbiske er meir utsatt for symptomer på svekka psykisk helse. Særleg når nazistar masjerer gjennom gatene i Kristiansand og roper ”ned med homolobbyen”. Særleg når det gjeld ein kommune som ifølgje slagordet skal vere ”gjestfri for nye tankar”.
Ordførar, kan du ikkje berre få ’an opp? Flagget, altså.
Dei er ikkje så farlege som du trur.