Godt krimhandverk

Fire psykologisk svært godt teikna ungdomar løfter boka.

«Glasshjerte»

Torkil Damhaug Cappelen Damm

«Glasshjerte» er i utgangspunktet ein tradisjonell krim. 16 år gamle Amina blir sporlaust borte. Syskenbarnet hennar, 19 år gamle Mikkel, som Amina har vore oppteken av på litt spesielt vis, er ein av dei siste som ser henne i live. Etter litt tid blir ho funnen, valdteken og drepen, og Mikkel blir mistenkt for å stå bak. Bror til Mikkel, Robin, er utviklingshemma. Han har sett det meste av det som skjedde med Amina, men manglar evne til å kommunisere det på ein skjønleg måte.

Jus-studenten Inga blir hovudstups forelska i Mikkel, og arbeider intenst med å prove at kjærasten er uskuldig. Om Boel, ein «gamalkjærast» til Mikkel, skal eg berre nemne at ho etter kvart får ein litt spesiell rolle.

Plottet er profesjonelt lagt opp – og gjennomført – men ikkje spesielt originalt. Spenningsnivået er høgt, utan å bli heseblesande. Når siste side er lesen, har nesten alt falle på plass. Eg nemner eit unntak seinare. Men, det er ikkje berre det krimtekniske som gjer boka så god.

For meg er skildringa av dei fire ungdomane det som gjer «Glasshjerte» til noko meir enn ein kriminalroman. Dei stig fram som truverdige personlegdomar, med gode og dårlege sider. Amina, som har ei mor som har konvertert til islam, har sett strenge krav til livsutfalding. 13 år gamal trassar ho mora.

Mor til Mikkel er kunstnar, og sonen har arva mykje frå henne, på godt og vondt. Inga, dotter til ein dyktig advokat, er gjennomført empatisk og sjølvstendig. Sist, men ikkje minst, skildringa av den sterkt funksjonshemma Robin, psykisk ikkje eldre enn 2-3 år, er flott. Samspelet mellom han og Mikkel er til tider rørande.

Tidlegare toppadvokat Rivers, som har sona åtte år for drap, er også ein interessant person. Han har blitt fråteken advokatløyvet, men advokaten til Mikkel engasjerer har som «konsulent». Det blir klårt at han sjølv er usikker på om han utførde drapet. Altså ein såkalla «laus tråd». Utan å seie meir, eg vil ikkje bli overraska om han dukkar opp att i ei komande bok. Til slutt, ei lita innstramming hadde gjort godt.