Skatteletteanger?

Ifølgje budsjettforslaget frå H og Frp vil vertskommunar for verk og bruk miste retten til å skrive ut eigedomsskatt på produksjonsutstyr.

●●Desse kommunane vil årleg tape over ein milliard kroner. Vennesla vil tape 18 millionar.

Mange sider ved forslaget til statsbudsjett vitnar om at regjeringa er på desperat jakt etter å kompensere lettsindige skattereduksjonar til dei mest velståande. Dei to skattefobiske partia ser ikkje, eller vil ikkje sjå, at vertskommunar for kraftutbygging og industrireising må ha ein andel av verdiskapinga som skjer lokalt. Det er nødvendig for å kunne lage nødvendig infrastruktur og gode velferdstenester for tilsette i dei aktuelle bedriftene og for innbyggarane generelt. Naeringslivet treng stabil og god arbeidskraft. Da må kommunane ha økonomi til å levere gode skule-, helse og omsorgstenester.

Regjeringa vil altså fjerne eigedomsskatt på verk og bruk ved at installasjonar og utstyr til produksjon ikkje skal skattleggast, slik kommunane har hatt høve til i hundre år. Berre bygningar og tomt skal gi grunnlag for eigedomsskatt. Det skal heller ikkje vere eigedomsskatt på kraftleidningar og nettanlegg.

Vertskommunar for verk og bruk, nettanlegg og kraftlinjer har avgitt store areal til nytte for heile samfunnet, men vil få lite tilbake. Regjering seier at omlegginga skjer av omsorg for bedriftene, men det stemmer ikkje heilt. Når eigedomsskatten til kommunane blir redusert, vil staten få større skatteinntekter, fordi utlikna eigedomsskatt reduserer grunnlaget for selskapsskatt til staten. Denne omfordelinga er derfor eit statleg ran frå distriktskommunar der verdiskapinga skjer.