Trump på UIA?

«Hvordan vi best kan utvikle det norske språk, både bokmål og nynorsk, er en viktig debatt». Slår Uia-leiinga fast, den 26. juni. Ikkje eitt ord meir enn det.

●●Dei er «godt fornøyd med at vårt fagmiljø ... viser et brennende engasjement». Høyrest fint ut, men blir ei fornaerming når alle på universitetet veit at leiinga ikkje tok kontakt (!) med sitt «fantastiske» fagmiljø i forkant av sitt uhøyrte språkpolitiske forslag om å få sleppa unna den statlege mållova (som sikrar nynorsk visse rettar). Leiinga snakkar vakkert, men det dei foreslår, fører til ytterlegare diskriminering. Dei veit det.

«Ingen universitet eller høyskoler oppfyller kravene i målloven». Lesarane les nok dette slik at ingen universitet eller høgskule oppfyller krava til nynorsk. Er det sant? Nei, det er ikkje sant. Sjekk Høgskulen på Vestlandet (dei har faktisk nokre gonger hatt for lite bokmål.) Sjekk tiåret 2007 til 2017 ved landets nest største universitet, Universitetet i Bergen. Står det dårleg til med nynorsken der? Kvifor uttrykkjer UIA seg slik? For å halda fakta unna.

«Språkpolitikk er et viktig element i kulturpolitikken», skriv leiinga vidare. Og strekar under at «UIA er levende opptatt av å ivareta universitetets samfunnsansvar». Ikkje ein gong studentar som ønskjer å få eksamensoppgåvene sine på nynorsk, kan vera trygge på at det skjer. På det statlege universitetet.

Trump og Listhaug har fått UIA på laget. Det gjeld om å seia ting med fynd, vel vitande at det ikkje er sant. Leiinga lovar no høgtidleg at dei skal styrkja bokmål OG nynorsk. Time will show.