Folk tykkjer det er tøft at eg driv med dette.
Nyinnspelt hardingfelemusikk fra Agder er sjeldan. Enno meir uvanleg er det at ei ung kvinne står bak.
– Det var ikkje før eg kom på kappleikar at eg møtte andre på min eigen alder som heldt på med dette, seier Johanne Flottorp (27) frå Åmli. Hardingfelespelaren kom nettopp ut med ei sjølvtitulert debutplåte med både klassiske setesdalsslåttar, slåttar frå Vest-telemark og Tovdals-slåttar ho har laert av sambygdingen Salve Austenå (92).
– Det var meg og Salve som var hardingefelemiljøet i Åmli. Det var sjølvsagt fleire som spelte hardingfele i kulturskulen, men ikkje så mange som heldt fram etter ungdomstida, seier Johanne som spelar solokonsert på Vaktbua i Kristiansand på tysdag. (Ho er óg med i americanabandet The Northern Belle som spelar saman med Silver Lining på Hos Naboen laurdag 27. oktober.)
DEI ANDRE LO
Johanne Flottorp gjekk ut frå Noregs musikkhøgskule i 2017 og jobbar no som musikar og musikklaerar med base i Oslo. Ingen av foreldra spelar hardingfele, så dette var ikkje noko ho fekk inn med morsmjølka.
– Men vi høyrde mykje forskjellig musikk heime, og eg likte Bukkene Bruse. Då eg gjekk i første klasse skulle alle ta med ein CD med musikk dei likte til skulen. Eg skjønte ikkje kvifor dei andre lo av musikken min. Eg tykte det var dei som var rare og ikkje eg, seier Johanne.
ANNBJØRG LIEN
Ho var seks år då ho først prøvde hardingfela på kulturskulen i Åmli, og snart var ho i laera hos spelemannen Salve Austenå som då var 70 år. Han har sidan vore den viktigaste laeremeistaren hennar. Seinare har Johanne mellom anna også hatt Annbjørg Lien frå nettopp Bukkene Bruse som laerar. På plata finn ein både ting ho har spelt sidan ho var ti år og ting ho har laert seg heilt i det siste. Og resultatet er altså noko som er nokså uvanleg:
– Mange unge spelar folkemusikk, men det er lenge sidan nokon frå Aust-agder utanom Setesdal har gjeve ut soloplate med hardingfele, seier Flottorp.
SOLOSPEL
– Korleis blir du motteken med denne musikken?
– Folk tykkjer det er tøft at eg driv på med dette, både dei innanfor og utanfor folkemusikkmiljøet. Eg har spelt seks solokonsertar i haust, seier Johanne som er heilt åleine på scenen når ho opptrer.
– Det er noko godt med dette å stå åleine og ha ansvaret sjølv. Eg merker også at det er interesse frå det utanlandske folkemusikkmiljøet for denne sjangeren. Dette med solospel er eit saermerke for folkemusikken i Noreg, seier ho.
Plata er spela inn på selskapet Ta:lik i Ormøy kyrkje, og innspelinga er støtta av mellom anna Kulturrådet og Austagder fylkeskommune.