Jernbaneprivatisering utan angreknapp
Eit engelsk selskap med frynsete rykte har fått kontrakt på å køyre tog på Sørlandsbana.
●●Samferdselsministeren lovar gull og grøne skolar. Alt skal bli betre, og regjeringa skal spare pengar, blir det hevda. Men når noko ser ut til å vere for godt til å vere sant, så er det gjerne det. Distriktssekretaer i LO stat, Odd Helge Henriksen, viser oss ei anna side av medaljen i eit innlegg her i avisa sist tirsdag. Og på toppen av det heile så legg regjeringa no opp til at det skal bli umogeleg å reversere privatiseringa dersom forventningane ikkje slår til.
Go-ahead som skal overta togdrifta på Sørlandsbana, driv ein offensiv omdømmekampanje, men selskapet får dårlege karakterar av passasjerane i heimlandet. Den engelske avisa The Times undrar seg over at den norske regjeringa vil satse på eit selskap som har så dårleg rykte i England. Dei spør om regjeringa er så glad i den engelske modellen med konkurranseutsetting at dei bevisst overser problema.
Samferdselsministeren forsikrar oss om at utflagginga ikkje vil føre til lønnspress og sosial dumping. Men her snakkar han mot betre vitande. Det er riktig at dei tilsette i NSB blir med over i det nye selskapet med uendra lønnsvilkår. Men det gjeld berre fram til neste lønnsforhandling. Då er lønn og arbeidsforhold i spel, og vi kan få eit sterkt press på lønnene i jernbanesektoren slik vi har i andre deler av samferdselssektoren.
Konkurranseutsetting og utflagging av togtransporten er ei ideologisk flaggsak som den blåblå regjeringa har pressa igjennom med støtte frå KRF. Men dei gir seg ikkje med det. No vil regjeringa hindre at ei ny regjering med eit anna syn kan gå tilbake til offentleg drift. Det oppnår dei ved å slutte seg til EU sin fjerde jernbanepakke som påbyr at all togdrift skal setjast ut på anbod.
Vi må leve med at eit politisk fleirtal har valt å konkurranseutsette og flagge ut togdrifta på Sørlandsbana. Det er ein del av demokratiet. Men det er ikkje demokratisk å hindre at framtidige storting kan gjere om på denne avgjerda. Det er på tide å vakne opp og protestere mot den fjerde jernbanepakken til EU. Vi kan ikkje la den blåblå regjeringa innsnevre det demokratiske handlingsrommet til framtidige storting.