Kommunar må få sin rettmessige del
Kva om EU gjennom Eøsavtalen skulle komme med krav om at skatteinntektene frå norske oljefelt skulle slusast inn til EU?
Noreg skulle rett nok få tilbakeført ein del etter ein ikkje definert fordelingsnøkkel. – Utenkeleg og utrettferdig, vil vel alle meine. Men det er liknande forslag det regjeringsoppnemnde Sanderudutvalet har lagt fram. Vennesla senterparti ber Stortinget vrake innstillinga. Det finst andre stimuleringstiltak for å effektivisere kraftverka utan å ta vekk inntektene til vertskommunane, som har ofra naturresursar.
Sanderudutvalet skulle vurdere om gjeldande skattesystem hindrar eller gjer det lite lønnsamt å oppgraderte og effektivisere kraftverka, altså auke produksjonen av grønn energi. Utvalet forslår å redusere eigedomsskatten og å avvikle ordninga med konsesjonsavgifter og konsesjonskraft. I staden skal kraftselskapa betale grunnrenteskatt som Staten seinare kan fordele mellom kommunane.
Går dette igjennom i Stortinget, vil vertskommunane tape over 3,6 milliardar kroner i direkte inntekter kvart år. KS har rekna ut at dei store byane vil vinne på omlegginga og vertskommunane ute i distrikta tape. Vennesla kommune kan årleg tape opp til 20 mill kroner fordelt slik: Eigedomsskatt: 10-15 mill/år, konsesjonskraft 5,5 mill/år og konsesjonsavgift 287.000/år.
Forslaget bryt med ein historisk og vellykka samfunnskontrakt, nemleg at vertskommunane for det første skal ha kompensasjon for tapt natur. Det kan vere i form av neddemte område for rekreasjon og beite, tapt fiske, tørrlagte fossar og stryk, endra vassføring i elvane og t.d. krypsivproblem, som kommunane langs Otra er plaga med. For det andre bryt forslaget med eit opplagt og rettferdig prinsipp om at kommunane skal ha sin del av verdiskapinga frå vasskraftproduksjonen.
Både kraftbransjen og Landssamanslutninga av vasskraftkommunar tvilar på at omlegginga Sanderudutvalet forslår, vil utløyse nye investeringar for å effektivisere kraftverka. ODDVAR MOEN, Vennesla senterparti