Sp vill-leier om laksefiske
Eivind Drivenes frå Senterpartiet seier i Faedrelandsvennen 14. juli at eg nå er i ferd med å ta livet av kystfiskeflåten på Sørlandet, og at eg overprøver Stortinget.
● Det han ikkje seier, er at Senterpartiet i det store og heile er samd i dei innstrammingane som regjeringa har satt i verk.
Fremskrittspartiet fremma forslag om at Stortinget skulle be regjeringa stoppe innstrammingane i sjølaksefisket og føre vidare reguleringa av sjølaksefisket i 2021 etter same regelverk som i 2020. Det var berre Fremskrittspartiet som stemde for dette forslaget, Senterpartiet gjekk mot.
Det er gode grunnar til at et nesten einstemmig Storting støtter innstrammingane. Hovudprinsippet for norsk villaksforvalting er at det ikkje skal tillatast fiske på bestandar som ikkje har eit dokumentert haustbart overskot. Sjølaksefisket er eit fiske på blanda bestandar. I kystområda vandrar fleire titals bestandar i kvart kystfiskeområde. Mange av desse er bestandar utan haustbart overskot, som høyrer til i vassdrag kor fisket er stengt eller strengt regulert. Dette er bakgrunnen for reguleringane som er vedtatt.
Regjeringa har følgt opp alle Stortinget sine vedtak på dette området. 25. mai bad Stortinget regjeringa om å tillate krokgarnfiske i Finnmark i 2021. Miljødirektoratet vedtok allereie 1. juni endringar i forskrifta. Endringane tok til å gjelde med ein gong.
Stortinget bad 25. mai også om at regjeringa skal gjere ei ny vurdering av innstrammingane i sjølaksefisket og korleis dei vil virke konkret for sjølaksefiskarane på Sørlandet.
Departementet har ikkje tilstrekkeleg grunnlag for å konkludere med at innstrammingane i sjølaksefisket for 2021 vil ramme fiskarane på Sørlandet hardare enn fiskarar i andre landsdelar. Dette krev meir kunnskap. For å følgje opp Stortinget sine vedtak har vi derfor bedt Miljødirektoratet om å gjere ei vurdering.
Stortinget vedtok også at det skal gjerast lempelege vurderingar av søknader om dispensasjon for fiskarar som mister ein stor del av si inntekt, og som står utan andre moglegheiter for inntekt. Stortinget sitt vedtak kan ikkje gjennomførast med dagens regelverk. Utgangspunktet i dag er at ein berre kan hauste av bestandar som har eit haustbart overskot. Om ein skal opne for dispensasjonar til å fiske på sårbare bestandar ut frå privatøkonomiske omsyn, vil det rokke ved heilt grunnleggande prinsipp i naturforvaltninga. Skal vi gjere det, må vi som eit minimum gjennomføre ei grundig utgreiing og høyring. Truleg må vi òg endre naturmangfaldlova. Departementet har ikkje nødvendige heimlar i regelverket til å gi slike dispensasjonar per i dag, og det er såleis ikkje mogleg å gjennomføre i inneverande fiskesesong.
I tillegg bad Stortinget regjeringa gjennomføre ei evaluering av status for små og sårbare bestandar av villaks og at Stortinget får ei orientering på passande vis etter sesongen 2021. Miljødirektoratet har fått i oppdrag å følgje opp også dette vedtaket.
Eg har altså følgt opp alle Stortingets vedtak, men alle tiltak kan ikkje gjennomførast like raskt, heller ikkje om Senterpartiet skulle styre. SVEINUNG ROTEVATN (V), klima- og miljøminister