Jernbane i Noreg

Det er ikkje godt å vite kvar det gjekk galt, men det med jernbane kan vi ikkje få til.

Vi har ikkje fått det til sidan Bergensbanen vart åpna i 1909. Det var dristig satsing, både av politikarar og av ingeniørar. Eit heilt statsbudsjett vart bruka den gongen.

Men så har det liksom stoppa opp.

Sørlandsbanen var og eit krafttak. Den vart bygd i fleire etappar, og sluttført av tyskarane under krigen. Men lite er gjort med banen sidan han var ny. Difor slit vi med vedlikehald, og der er stadig signalfeil. I tillegg kjem naturtilhøve som snø, flaum og ras.

Før hadde vi NSB å forhalde oss til.

Så enkelt er det ikkje lenger. Jernbanedrifta er delt opp i fleire selskap. Eit har med sjølve jernbanen å gjere, men togdrifta er lagt ut på anbod, så det er eit engelsk selskap, Go-ahead, som driv trafikk på Sørlandsbanen.

Så har vi VY som driv trafikk på Austlandet. Akkurat som det skulle hjelpe noko å skifte namn? Merkeleg pengebruk, spør du meg.

Dei som bruker tog, seier det er vanskeleg å bestille billettar, for det er visst eit anna selskap. Er du databrukar, går det an, og det er visst mogeleg, enn så lenge, å bestille pr telefon. Då koster det meir.

Mykje har vore prøvd av jernbane- entusiastar og politikarar, men det har ikkje ført til betring. I mange tiår har dei prøvd å få til ei samankopling mellom Sørlandsbanen og Vestfoldbanen. Planane har ligge der i 30 år. Det ville korte reisetida mellom Kristiansand og Oslo med 1 time. Kanskje då tog kunne konkurrere med fly, buss og bil?

Dette fører meg inn på Follobanen. Ei flau historie. Og endå verre; ei dyr historie. Denne hendinga har vel ikkje nåverande regjering skulda for, men dei har fått ho i fanget. Stor ståhei med åpning, og kongen med på første tur.

Så sa det stopp. Og det har stått lenge. Den eine tisdsfristen ryk etter den andre. Nå er nok ikkje sluttrekninga på 36,7 mrd. lenger… Og ingen veit når Follobanen åpnar att.

Nei, eg må vedgå at jernbanedrift i Noreg har eg ikkje tru på.

Når det gjeld Sørlandsbanen, så meiner eg at det er som å bere havre til ei daud hest.

Det har eg tatt konsekvensen av. Det blir altfor mange gonger «buss for tog», så dersom eg ei sjeldan gong skal til Oslo, vel eg å gå rett på bussen!