Politikkarit väärässä taktissa

Isotinganvaalin äänet oon laskettu ja se näkkyy protestivaalilta. Politikkarit kuljethaan aivan eri taktissa ko net ihmiset jokka oon heitä äänestänheet ja nyt het hunteerathaan ette mikä meni väärin. Johtaajilla oon vaikkeet paikat.

Ruijan kveeniliitto luki vaalii ennen parttiitten vaaliprogramit ja teki sitte, vähän leikilä, listan siitä mikkä parttiit oon parhaat kainulaisile.Voittaajat olthiin Kristilinen kansanparttii ja Sosialistinen venstreparttii ja toisela sijala olthiin Punaiset ja Miljööparttii Vihriset. Kukhaan ei saata väittäät ette Kristilinen parttii olis menestynny vaalissa; päinvastoin vaali oli sille kaikkiin huonoin sođan jälkhiin. SV, Punaiset ja Vihriset menestythiin paremin ja net saathiin lissää äänii.

Regioonireformi, tappelu sentraaliseeraamista vasthaan ja paikaliset teemat nävythään vaalin tuloksessa. Äänestäjät oon kääntänheet sölän parttiile mikkä ei kuuntele kanssaa. Finmarkussa Työväjenparttii sai vähemän äänii ko milloinkhaan 2000-luvula ko taas Senterparttii sai viisi kerttaa enämen.

Astrid Lindgren sanoiki ette ko vallanpittääjät lakathaan kuulemasta kanssaa, se oon aika vaihtaat net pois.

Se näyttää ette äänestäjät olis halunheet muistela siitä het pöläthään tervheyspalveluksitten ja työpaikoitten puolesta. Maslow oon tehny pyramidin siitä mitä ihminen tarvittee, ja sen jälkhiin tervheys ja työ oon tärkkeimät sitte ko aivan perustaavat fysiolookiset tarpheet niinko nälkä, jano ja uni oon täytetty. Ihmisellä oon tarvet tiettäät ette hänelä oon tulleevaisuuđessaki työ sekä turvalinen paikka missä hän assuu ja ellää. Hän halluu tiettäät ette tämä jatkuu, pyssyy ja kestää tulleevinaki vuosina.

Met emmä saata tiettää kunka kainulaiset oon äänestänheet mutta ko tieđämä ette joka neljes finmarkkulainen ja tromssalainen oon kainulaiset, saatama uskoot ette joka neljes Ap:n äänestäjä oon ollu kainulainen - ja ette joka neljes joka nyt oon kääntänyt heile sölän, oon kainulainen. Ihmiset oli uskonheet ette tämä parttii puhuis pienten ihmisten puolesta mutta se oon nyt loppu.

Saama sitte nähđä oonko uusila koalisuuniila humaanimpi minoriteetti- ja kielipolitikki ko mitä työväjenparttiila oli kainulaissii vasthaan.

Sentterparttii sai Isotinkhaan kaksi uutta eđustajaa pohjaisesta, Sandra Borchin ja Geir Iversenin. Molemat oon vastustanheet hallituksen kivenkovvaa sentraaliseeraamispolitikkii. Sentraaliseeraaminen uhkaa pieniin paikkoin elämänlaattuu. Se oon hirmuisen tärkkee ette regioonireformissa otethaan vaarin paikalisesta kulttuurista ja kielestä, niinko pörinteisestä tieđosta mikä joutuis syrjhään jos ajatelhaan tyhä effektiivisyyttä.Toivoma ette vaikka toimintoi ja palveluksii moderniseerathaan, hallitus ajattelis kans pitkän aijan vaikutuksii.