Færre bustader til vanskelegstilte
Ordføraren i Sandnes reagerer på at regjeringa kutta støtte til bustader for vanskelegstilte. Konsekvensen er færre nye heimar til rusavhengige og andre som slit med å finne seg ein heim.
Sandnes kommune har lenge jobba for å skaffe bustader til dei som verken eig eller leiger sjølv. I 2016 var 110 personar utan bustad, medan talet var 244 i 2012, viser ei kartlegging frå by- og regionsforskningsinstituttet NIBR.
Men ei endring i regjeringa sitt reviderte nasjonalbudsjett gjer det vanskeleg å halde fram i same retning. No må det nemleg vere døgnbemanning på slike bustader for at kommunane får innvilga støtte, såkalla momskompensasjon på investeringar.
Færre bustader
– For vår del betyr det at ein fjerdedel av finansieringa av slike bustader forsvinn no. Det betyr at vi ikkje klarer å bygge så mange som vi ønska, seier ordførar Stanley Wirak (Ap).
I Sandnes er det planlagt å bygge 26 småbustader innan 2018 for rusavhengige, menneske som slit psykisk eller andre som slit med å finne bustad. Desse skal bli spreidd rundt om i heile byen med mål om å plassere dei i vanlege bumiljø.
– Her brukar ein ikkje nødvendigvis fast bemanning, men heimeteneste eller miljøterapeutar. Vi vil framleis få støtte til dei aller, aller svakaste, men mange av bustadane har ikkje døgnbemanning, seier rådgjevar Bodil Sivertsen.
Skal Sandnes likevel klare å bygge dei planlagde bustadene, må dei få tak i 11 millionar i eit allereie stramt budsjett.
– Alt er mogleg, men det kjem jo på toppen av alt det andre. Då må vi prioritere ned noko anna, seier Wirak.
Stram økonomi
– Om regjeringa ønsker færre bustadslause, må dei gi kommunane verkemiddel til å løyse dette. Dette gjeld alle kommunane. Og for Sandnes som har stram økonomi, vil dette ha ganske mykje å seie, seier Sivertsen.
Sandnes har bedt regjeringa vurdere korleis dette kan gjerast anleis. I eit brev signert ordføraren står følgjande: «Det kan vanskelig forstås at dette er forenlig med Regjeringens satsing på rusområdet. For Sandnes er bolig vesentlig for at målgruppen bostedløse og personer med rus/ psykiske lidelser skal ytes et fullverdig tilbud».
Rusavhengige
Halveringa i andelen bustadslause heng både saman med nedkonjunktur i bustadmarknaden og kommunen si satsing på området. Men talet er framleis høgt samanlikna med andre kommuner. Berre Bergen har ein høgare andel per tusen innbyggar.
Den nasjonale kartlegginga viser dessutan at ein større del av dei bustadslause i Sandnes har samansette problem enn bustadslause på landsbasis.
I eit notat til bystyret frå juni, skreiv administrasjonen ved rådmann Bodil Sivertsen at unge under 25 år er ei særskilt utfordring. Dessuten er heile 80 prosent av alle dei bustadslause i Sandnes rusavhengige og 37 prosent slit psykisk.