Kontroll over barna?
Når vi snakkar om familiar med låg inntekt slik Christian Wedler i Frp gjer når han foreslår å føre barna deira opp på ei liste, kan ein få inntrykk av at dei ikkje duger. Måndag 19. juli diskuterte heile bystyret i Stavanger levekårssituasjonen i kommunen vår. Dei aller fleste partia kom fram med sine synspunkt. Særleg området rundt familiar med låg inntekt eller fattige familiar var diskutert.
At fattigdomsproblematikken i vår by blir diskutert i bystyresalen, er både rett og rimeleg. Er det noko som har vore viktig for KrF i lengre tid, så er det å vere oppteken av korleis vi som by skal ta vare på og betre situasjonen for dei fattige barna og familiane deira, eller familiar med vedvarande lav inntekt, som Statistisk sentralbyrå vel å kalle det.
Uryddig
At Christian Wedler, gruppeleiar i Frp, med sitt utspel i Aftenbladet 20. juli, no har kome på nokre nye måtar å motverke fattigdom på, i etterkant av debatten i bystyret, blir for meg uryddig. No skal det lagast lister over kven desse barna er, om dei går i barnehage eller SFO, og kva resultat dei har på skulen. I tillegg kva dei er engasjert i på fritida. Kvar er personvernet og menneskesyn? Kva er innhaldet i dette?
Betre seint enn aldri, kan vere eit godt uttrykk i nokre politiske samanhengar, når ein kjem på nye og smartare løysingar, men dette forslaget går mot KrF og mitt verdisyn på personvernet. Når vi snakkar slik om disse familiane, kan ein få inntrykk av at dei ikkje duger.
Stigmatisering
Å vekse opp ei ein familie med vanskeleg økonomi og låg inntekt vil ikkje seie at der ikkje er varme og omsorg. Både i velståande og fattige familiar har vi utfordringar. Dette har eg både møtt og erfart gjennom mitt arbeid som sosialarbeider i over 20 år.
Som barnevernspedagog og politikar er utspelet vanskeleg å få tak i, og eg stiller med svært undrande og er skeptisk. For nettopp desse barna er stigma og utanforskap noko dei kjenner på kvar einaste dag, og at det no kjem forslag om at vi i tillegg skal listeføre dei, slik at vi kan føre tilsyn med korleis dei gjer det på ulike felt i livet, er for meg ein lite konstruktiv idé.
Ja, det skal vere slik at om ein kjem på noko smart, så kan ein prøve å ta opp dette i aktuelle fora, men for meg står dette ikkje verken som smart eller gode løysingar for dei barna dette gjeld.
Mange tiltak
Vi har mange ulike tiltak i Stavanger kommune som nettopp er retta mot fattige familiar. Her kan eg nemne levekårsløftet på Storhaug, HOLF (Heilskapleg oppfølging av låginntektsfamiliar) og «Eg vil lære» (fokus på barns potensial og foreldrerettleiing) som tiltak Stavanger kommune har sett i verk som viktige prosjekt. Vi jobbar tverrfagleg saman for å førebygge utanforskap og ulikskap. Då er ikkje lister og kontroll ein gode idé.