– Eg er ingen helgen
NY SJØLVBIOGRAFI: Merete Hodne meiner ho har blitt framstilt som eit monster.
– Eg har alltid hatt lyst til å skrive og har tenkt at eg skulle gjere det når eg blei pensjonist, men no har det blitt så mykje å skrive allereie. Så får det heller kome ein oppfølgjar, seier Merete Hodne.
Frisøren frå Bryne blei eit kjent fjes i mediene då ho nekta muslimske Malika Faviano (som då heitte Bayan) adgang til salongen fordi ho var ikledd hijab. Deretter kom rettssakane mot revylaget Løgnaslaget som ho gjekk til sak mot fordi dei kalla henne «nazifrisør».
Hijab-saka var innom både Tingrett og Lagmannsrett som konkluderte med at Hodne hadde gjort noko straffbart. Ho tapte også då ho gjekk til sak mot Løgnaslaget.
– Eg meiner eg har blitt feil framstilt i mediene. Innimellom er der journalistar som skriv om meg på ein fin måte, men ofte har eg blitt framstilt som eit monster. Eg er jo ikkje det.
Sjølvbiografien «En bok uten filter» er skrive av Hodne sjølv og gitt ut på Kolofon forlag.
– Eg har gått grundig gjennom avissakene, og så skriv eg om mine eigne opplevingar. Eg er aerleg, eg er ingen helgen og framstiller meg heller ikkje som det. – Kor detaljert går du inn i hijab-saka?
– Eg skriv grundig om saka, men utan å nemne andre namn enn Malika. Eg har fått vite at det heile var gjort som ein provokasjon. Ho er hyggeleg, men lyg så det renn. Slike mennesker er farlege fordi dei verkar snille og gode.
– Tenker du ikkje at ho burde fått lese gjennom når du kjem med slike karakteriseringar?
– Eg har ikkje snakka med ho. Eg har heller ikkje noko å stå til rette for med ho etter alt som har hendt. No veit eg ikkje kva som er vanleg, men Løgnaslaget spurte heller ikkje meg før dei stempla meg som nazist. Dette svirrar framleis i hovudet mitt kvar dag.
Malika Faviano har heile tida nekta for at ho oppsøkte frisørsalongen som ein provokasjon. Ho reagerer på at Hodne nok ein gong kaller ho løgnar.
– Etter fleire runder i retten blei ho funne skuldig, og då er saka ferdig for min del, seier Malika Faviano.