Midtaustenekspert fryktar Nato-støtta angrep i Syria
SYRIA: Verda står kanskje ovanfor ei stormaktskonflikt i Syria. Midtausten-ekspert Hilde Henriksen Waage forklarer den spente situasjonen.
– For første gong ser det ut som vi kanskje står framfor ein direkte konfrontasjon mellom USA og Russland. Verda held pusten no, seier Midtausten-ekspert Hilde Henriksen Waage ved Prio.
Donald Trump kom onsdag med ei klar åtvaring til Russland:
– USA lovar å skyte ned alle missilar som blir skotne mot Syria. Gjer dykk klare Russland, for dei vil kome, fine og nye og «smarte», sa han. Bakgrunnen er gassangrepet i Douma laurdag.
Kven deltar?
Storbritannia si regjering har i går krisemøte for å diskutere kor vidt dei skal delta i eit slikt angrep. Og Frankrikes president Emmanuel Macron er venta å uttale seg om saka under eit fjernsynsintervju torsdag ettermiddag, ifølge AFP.
– Vi kan i verste fall få eit koordinert vestleg angrep, kanskje til og med klarert med Nato. Situasjonen går frå vondt til verre om dette blir ei omfattande stormaktskonflikt. Spørsmålet er kor lojale Storbritannia og Frankrike føler dei må vere. Det er vanskeleg å seie korleis dei skal klare å komme seg ut av det. Dette er nok også avhengig av kva planar USA har med eit slikt angrep, seier Waage.
Norge kjem ikkje til å delta i eit slikt angrep, melde Dagbladet i går.
Kven er det USA vil angripe?
– Problemet er Trump og hans uberegnelegheit. Vi veit dei vil angripe, men ikkje kven USA ønskjer å straffe. Trump kan endre meining mange gongar i løpet av eit døgn, seier Henriksen Waage. – Konsekvensen av angrepet er at syrarane vil lide, det vil føre til større sivile tap. Spenninga i Midtausten aukar veldig. Situasjonen i Syria er på mange måtar svaert uoversiktleg. Opprørsgruppene har inga tydeleg leiing, og har ikkje evna å koordinere motstanden, seier Henriksen Waage.
– Uavhengig av kva som skjer dei komande vekene, har eg ein dyster konklusjon: Assad kjem til å halde fram å styre med hard undertrykking.