Spekkhoggarane kom heilt inntil båten til familien
SANDSFJORDEN: Endre Eide og familien heiv seg i båten då dei fekk høyre at det var spekkhoggarar i fjorden. Dei fekk oppleve spekkhoggarar kome heilt inntil og under båten.
– Vener ringde meg og fortalde at spekkhoggarar var observert heilt inne ved Sand, og at dei var på veg utover i fjorden. Då heiv vi oss i båten, seier Endre Eide.
Han er busett på Sand, men familien var mandag ettermiddag på Ottøy der dei har eit småbruk. I 16-tida ringde vener og fortalde om spekkhoggarane dei hadde sett.
Under båten
– Vi trudde først det var fire stykk, men fann etterkvart ut at det må ha vore fem eller seks. To av dei var små og truleg ikkje fullvaksne, og så var der fleire som var store. Det var ei flott oppleving for både store og små, seier Eide.
– Det er ikkje ofte dei blir observert her, eg trur det er meir vanleg i Vindafjord. Eg har i alle fall aldri opplevd å sjå spekkhoggarar i Sandsfjorden tidlegare, og andre eg har snakka med seier dei berre har sett niser her før, aldri spekkhoggarar.
Med båten tok familien følge med spekkhoggarane utover i Sandsfjorden mot Skorpene. På Aftenbladet.no kan du sjå filmen. Den viser Eide sine to søner som hyler av glede i det spekkhoggarane kjem heilt inntil og under den stilleståande båten.
Kan bli ni meter lange Spekkhoggaren er den største av kvalane i delfinfamilien. Dei fleste held til i Antarktis, men i Norskehavet og Barentshavet reknar ein med at det er rundt 3000, ifølgje Norsk polarinstitutt. Hannane kan bli opptil ni meter lange og kan vege 5,5 tonn, medan hoene blir opptil 7,7 meter lange og på det meste veg 3,8 tonn.
For om lag eit år sidan skreiv Aftenbladet om spekkhoggarar som blei filma ved Hundvåg. Tiu Similä, som har tatt doktorgrad på spekkhoggarar, forklarte då at det ikkje er spesielt vanleg at dei kjem inn i fjordane her i området.
– Spekkhoggarane brukar heile Norge sin kyst. Dei følgjer gjerne etter sild. Dei siste åra er det også dokumentert at ein del spekkhoggarar har spesialisert seg på sel.
– Dei lev i familieflokkar og blir i flokken dei er føydd inn i, men dei driv ikkje med innavl. Vanleg størrelse på flokken er ti til tolv dyr. Om vinteren i NordNorge kan vi sjå flokkar på fleire hundre dyr, men då er det fleire familiegrupper som har samla seg, sa Similä.
Spekkhoggar-familiene snakkar eigne dialekter, og dei ulike gruppene verkar dessutan å spesialisere seg på forskjellege type byttedyr, alt frå små fisk som sild til sel og pingvinar, ifølgje Norsk polarinstitutt.