Wirak: - Regjeringa undergrev velferdsmodellen
SANDNES: Sandnesordførar Stanley Wirak (Ap) trur arbeidarane sine rettar vil møte stadig meir press i framtida. Han frykter vi går mot eit lausarbeidarsamfunn.
– Presset på dei faglege rettane uroar meg. Kortvarige arbeidskontrakter og eit veksande lausarbeidarsamfunn svekkar arbeidsfolket sine rettar. Eg trur presset berre blir sterkare i framtida, seier Stanley Wirak (Ap) etter å ha halde hovudtalen under Sandnes si 1. mai-markering.
– Hån mot fagrørsla
I Høgre, Frp og Venstre si regjeringserklaering står det at «Regjeringen anerkjenner at mange arbeidstakere velger å vaere uorganisert.» Ordføraren som i Sandnes har vore i koallisjon med Frp sidan 2011, gjekk hardt ut mot regjeringspartia.
– Den norske regjeringa undergrev velferdsmodellen ved at fleire og fleire må ta til takke med midlertidige stillingar. Det er det dei demonstrerer for heile verda når dei vel å skrive at dei anerkjenne det uorganiserte arbeidslivet. Det er eit hån mot fagrørsla, sa Wirak i talen.
– Vi ser der er krefter som ønsker å svekke dei faglege rettane. Vi ser døme på sosial dumping. Vi ser døme på at det blir tatt inn arbeidstakarar frå andre land der våre krav til lønns- og arbeidsvilkår ikkje blir respektert. Dette skal vi stå imot, og då treng vi framleis ei sterk fagrørsle, sa han.
Innleigd arbeidskraft
Ein av dei største parolane i toget var«Nei til bemanningsbyrå». Ved tusenårsskiftet kom ei lovendring som gjorde det enklare for private og offentlege verksemder i Norge å leige inn tilsette frå bemanningsbyrå, eller vikarbyrå som det óg blir kalla.
– Vi må kjempe mot bemanningsbyråa som undergrev den norske modellen, sa Tord-Viljar Husebø (Raudt) i sin appell.
– Sandnes har sagt nei til bemanningsbyrå i kommunen. Det gjorde vi fordi det er slik det begynner, det som fører til kortare arbeidskontraktar og til lausarbeidarsamfunnet. Før var det sånn at om det var ein topp i arbeidslivet, så kunne ein få lov å ta inn via bemanningsbyrå. Men no er det meir og meir blitt hovudregelen i nokre bedrifter. Så må vi ikkje lage det heilt svart, for i mange bedrifter er dette ei ordning som fungerer heilt perfekt, seier Wirak.
Mange uorganiserte
Ap og LO eig ikkje 1. mai, var Sylvi Listhaug sin bodskap mandag.
– Dagen tilhøyrer arbeidarane i Norge, og mange av dei er verken medlem av Ap eller LO, sa ho til NTB. Ho heldt appell i Drammen.
– Vi har ein hundre år lang tradisjon for at denne dagen er viktig for oss. Den dagen Listhaug står opp og snakkar arbeidarane si sak, skal vi vere glade. Men ikkje så lenge ho held fram med å rakke ned på arbeiderrørsla, seier Wirak.
LO, Ap, SV og Rødt gjekk inn i årets 1. mai-feiring med open og hard strid i Nord-Rogaland. LO valde å trekke tilbake invitasjonen til Ap-nestleiar Hadia Tajik som hovudtalar i Haugesund. I talen snakka Wirak om usemjene som venstresida har levd med i mange tiår.
– Tidlegare i vår blei det gode samhaldet vårt satt på prøve. Mange engasjerte seg i ACER-saka. Det har vore ei tung og vanskeleg tid for partia på venstresida, men vi kan ikkje la denne usemja splitte oss. EØS-saka har skapt usemje mellom partia på venstresida i 25 år. Dei siste tiåra har vi likevel klart å samle oss under felles parolar dei fleste stadane i landet. Arbeiderrørsla må stå saman, for om vi blir splitta taper vi, sa Wirak.