– Alle kjemper om rekene
REKEMANGEL: Rekefiskarar har ikkje hatt så dårleg fangst på nesten ti år. – Alle kjemper om rekene no, seier Karl Erik Pallesen ved Fisketorget.
– Alle kjemper om rekene no. Vi klarer berre å skaffe om lag halvparten av det vi fekk i fjor. Vi sel mellom 40 og 60 kilo reker på ein dag, medan vi i fjor på det meste solgte hundre kilo per dag på denne tida, seier kokk og fiskehandlar Karl Erik Pallesen ved Fisketorget i Stavanger.
Dårleg sesong
Tore Torgersen ved sjømatleverandøren Fiskemottaket Fonn Egersund seier til Aftenbladet at rekefangsten er dårleg i store delar av langet.
– Det er veldig mange butikkar som ringer oss, det er snakk om store områder som ikkje får tak i reker no. Vi får telefonar frå både Sør-Norge og Austlandet. Sesongen har generelt vore dårleg i år, men siste månaden har det vore ekstremt dårlege fangstar.
Karl Erik Pallesen ved Fisketorget i Stavanger trur dei kunne klart å selge ti gongar så mange reker.
– Vi har merka nedgangen dei siste to til tre månadene. Då blir det også dyrt for oss å kjøpe inn. Vi prøver å halde prisnivået på det same, men det betyr at vi går naermast i null på sal av reker.
– Men det har jo også med sesongen å gjere. I ei stund framover vil det vere mindre å få tak i.
Prishopp
Den dårlege rekefangsten påverkar prisnivået mange stadar.
– Her ser vi det er skilnad på korleis butikkane løyser det. Enkelte butikkar vel å sette opp prisane på rekene, medan andre vel å gå med tap for å ha eit lokkemiddel, seier Tore Torgersen ved fiskemottaket.
På Helgø Meny Mariero ligg kiloprisen på 200 kroner. I månadane januar, februar og mars har den vore nede i 119–129 kroner kiloen. Butikken har dei fått tilsendt reker med fly frå NordNorge, men klarer likevel ikkje å møte etterspurnaden.
– Kundane riv seg i håret. Det er førstemann til mølla no. Vi får leveranse onsdagar og fredagar, og då møter folk opp tidleg for å sikre seg, seier fiskeansvarleg Tom Erik Torkeldsen.
– Til onsdag har eg bestilt 100 kilo, men tippar eg får ein tredjedel av dette, seier han.
– Korleis opplever du at det er i år samanlikna med tidlegare år?
– Eg opplever eigentleg at det er sånn alltid på denne tida av året. Dette er den tida då alle i Stavanger skal ha reker, men så er det ikkje nok å få tak i. Etterspurnaden går jo også i taket med ein gong temperaturen bikkar 12 grader, seier han.
Ifølgje NRK vel enkelte rekefiskarar å ikkje dra til sjøs no fordi fisket er så dårleg no.
– Vi vel å ta vedlikehaldsarbeid no, så får vi håpe at rekene kjem tilbake i slutten av månaden, seier rekefisker Tor Steinar Fiskå som eigentleg skulle vore på sjøen med trålen Guldringnes.