Sandnes feirar stort – Stavanger langt på etterskot
KULTURBYÅRET: Mens Sandnes markerer tiårsjubileet for det europeiske kulturhovudstadsåret gjennom heile 2018, har Stavanger ikkje ein gong kome i gang med planlegginga av sitt opplegg – som skulle vore gjennomført i mars.
I dag kjem kulturminister Trine Skei Grand til Sandnes for å feira Vitenfabrikkens tiårsjubileum og opna jubileumsutstillinga «Øglaend i 150».
– Me feirar stort i Sandnes. Me har jobba med dette lenge, seier kultursjef Tone Strømø i Sandnes kommune.
– Me skal begynna å planlegga over pinse, seier kultursjef Arnfinn Bjerkestrand i Stavanger kommune.
14. juni i fjor møttest politikarane i Kommunalstyret for kultur og idrett i Stavanger til sitt siste møte før sommarferien. På sakslista stod blant anna eit forslag om å markera at det i 2018 er ti år sidan Stavanger og Sandnes var europeisk kulturhovudstad.
Kommunen hadde allereie sett av 100.000 kroner på 2017-budsjettet til planlegging og markering av tiårsjubileet. Nå foreslo rådmannen ei markering der gjenlevande prosjekt etter det store kulturåret blei løfta fram og fekk ei sentral rolle i markeringa. Det heile skulle kulminera med ein større internasjonal konferanse i Stavanger konserthus.
Politikarane sa ja – mot FrPs eine stemme – og la til at tiårsmarkeringa skulle gi byens profesjonelle kunstnarar og kulturoperatørar sjansen til å få visa seg og sine arbeid fram for byens befolkning i eitt eller fleire publikumsarrangement. 100.000 nye kroner blei sett av til å utvikla eit program for feiringa.
–Når politikarane
fattar
eit vedtak i kulturstyret, er kultursjefen forplikta til å følgja opp vedtaket. Det står i instruksen at det skal skje «utan unødig opphald», seier Rolf Norås, tidlegare kultursjef i Stavanger kommune – og tidlegare sentral i arbeidet med kulturhovudstadsåret «Stavanger 2008».
Reservert konserthus Kulturavdelinga hadde allereie vore i kontakt med Stavanger konserthus for å reservera Zetlitz-salen og foajéområda i konserthuset i perioden 12.-17. mars 2018.
– Eg kan stadfesta at me reserverte plass i mars 2018 til ein større konferanse og arrangement i samband med 10-årsjubileet for 2008. Men så blei arrangementet avlyst. Eller utsett, eg veit ikkje. Det ligg i alle fall ikkje inne i vårt program nå, nei, seier konserthusdirektør Per-Harald Nilsson.
For om du ikkje fekk med deg den store tiårsmarkeringa av kulturhovudstadsåret i Stavanger i mars, så har det altså si naturlege forklaring i at det ikkje blei gjennomført.
Det blei vist fram to danseframsyningar i konserthuset, i samband med at Regional arena for samtidsdans frå Sandnes markerte sitt tiårsjubileum. Men Stavanger var ikkje involvert og arrangementet kulturpolitikarane hadde bestilt ni månader tidlegare blei ikkje gjennomført.
Uklart i fylket
Også medeigarane Sandnes kommune og Rogaland fylkeskommune stilte seg positive til å vera med på å markera kulturhovudstadsåret ti år etter:
«Vi stiller oss (...) positive til initativet fra Stavanger kommune (...) og til å vaere en aktiv samarbeidspartner i dette,» som fylkeskultursjef Rune Thele skreiv i si tilbakemelding til kulturavde-