For lettvint, Stavanger
LEIAR: Ti år etter kulturhovudstadsåret er folk svaert positivt innstilte til kultur og kultursatsing. Men Stavanger kommune tar for lett på jubileet.
Åtte av ti meiner Stavanger har blitt ein interessant kulturby dei siste ti åra. Seks av ti reknar seg som svaert eller ganske interesserte i kultur. To av tre meiner det var rett av Stavanger og Sandnes å bli europeisk kulturhovudstad i 2008. Tre av fire meiner det er svaert viktig eller ganske viktig at kommunane i Stavangerregionen satsar på kultur.
Folk er rett og slett svaert positive. Og i denne undersøkinga gjort av Respons Analyse for Aftenbladet, er det folk i Stavanger, Sandnes, Sola og Randaberg som er spurt.
Det er ti år sidan kulturhovudstadsåret. Ti år sidan folk reiste til Gloppedalsura for å sjå dans, til Hundvåg for å sjå Jon Fosse som uteteater, eller tok til gatene i tusenvis ein vinterdag i januar for å sjå sjølve opninga.
Før det begynte, og mens det rulla og gjekk, var ein svaert oppteken av å snakka om langtidseffektar. Barn og unge blei haldne fram som den viktigaste gruppa å satsa på. Det skulle ikkje bare vera dette eine året som var viktig.
Rett før og rett etter, i 2007 og 2009, gjennomførte
IRIS spørjeundersøkingar på oppdrag frå kulturhovudstadsåret 2008. Dei spurde om kulturbruk, kulturinteresse og haldningar til kultur, for å måla eventuelle endringar.
Kulturstyret i Stavanger stemte ned eit forslag om å gjennomføra tilsvarande undersøking nå, ti år etterpå. Stavanger har heller ikkje, i motsetning til Sandnes, satt av saerleg med tid og tankar til å feira tiårs-jubileet skikkeleg. Kultursjef Arnfinn Bjerkestrand og leiar i kulturstyret, Annamaria Gutierrez (V), viser til at arbeidet med den nye kulturplanen har blitt prioritert.
Det er for lettvint.
Kulturhovudstadsåret hadde eit budsjett på
330 millionar kroner, 100 av desse frå private, resten offentlege. Publikumstalet nådde nesten to millionar, og gjer dermed kulturåret til det største kulturarrangementet som er gjennomført i Norge. I den breie kulturpolitiske støtta Stavanger 2008 hadde, låg også ei klar forventning om at kultur skulle bidra til å gjera Stavanger til noko meir enn oljeby.
330 millionar er mange pengar, og det er andres pengar. Å undersøka kva som har hatt effekt av den store kultursatsinga for ti år sidan, kunne gitt interessante referansar i arbeidet med kulturplanen. I tillegg til å ta eigen bys historiske kultursatsing på alvor.