Ungdommane fekk testa klatreløypa til proffane
SANDNES: Lange motbakkar stoppar ikkje ungdommen. Dei kan sykle like tøffe etapper som proffane.
I motbakkar tråkka over 400 elevar frå seks av Sandnes sine ungdomsskular. Frå Kulturhuset og opp Høgevollsveien, Skaarlia, Kleivane, Austråttbakken, og til slutt tilbake til Kulturhuset etter om lag 45 minutt med sveitte. Ved målstreken kan dei vere stolte over å ha sykla «climb-etappen», berre timar før proffane skal sykle den under Hammer Stavanger.
Tungt
–Det er jo berre oppover! Eg er heilt skjelven no, seier Natalie Stokka og løfter ein fot for å vise kor skjelven ho er.
Saman med tre andre jenter frå 8. trinn på Riska ungdomsskole står ho ved målstreken. Jentegjengen har stått der ei stund då Julie Evensen kjem syklande, hiv seg av sykkelen og dett mot bakken.
– Eg sykla feil, sykla opp ein bakke når eg eigentleg skulle fortsette rett fram, seier ho og legg seg heilt ned på den varme asfalten.
Kunne gå opp
Det er Nordsjørittet som arrangerer Tour Des Teens, sykkelrittet for ungdommane.
– Det er mykje bakkar, det er jo ikkje utan grunn det heiter climbetappen. Dei har fått køyrt seg, men så var det også lov å gå opp bakkane, så det er nok enkelte som har gjort det, seier dalgeg leiar i Nordsjørittet, Siri Ommedal.
Gruppa sykla samla med køyretøy både framfor og bak. Og fadderar, det vil seie frivillige frå mellom anna Sandnes Sykleklubb, var med for å rettleie og heie på ungdommane.
Elevar frå seks ulike ungdomsskular deltok: Lundehaugen, Høyland, Lurahammeren, Riska, Wang og Øygard. I ungdomsversjonen er det ingen konkurranse. Alle dei unge syklistane har fått utdelt t-skjorter, og absolutt alle, også klassekameratane på sidelinja, er med i trekninga av ein premie.
Eg sykla feil, sykla opp ein bakke når eg eigentleg skulle fortsette rett fram.
Julie Evensen