Kampen om ferjene i Ryfylke
SAMFERDSLE: For Heng, Sør-Hidle, Brimse, Helgøy, Byre og Sør-Bokn står kampen om å få reise, ikkje om korleis. Da meiner vi at dei som er landfaste og kan køyre, må vise storsinn ovanfor oss som ikkje kan.
I to lesarbrev i Aftenbladet fredag 25.05. tek representantar frå nordfylket til orde for at Finnøysambandet må leggast om etter brørne Andersen sitt ruteoppsett eller behalde ruteoppsettet som er i dag. Dette meiner dei fordi dei ikkje ønskjer at Nedstrand/Jelsa skal falle ut av ruta, samstundes som dei meiner det er meir effektivt. Begge alternativa legg opp til at transporten til øyane Heng, Sør-Hidle, Brimse, Helgøy, Byre og Sør-Bokn skal vere som det er. Desse øyane har rundt 90 fastbuande, 300 hytter og opp mot 20 naeringsdrivande/bedrifter.
I dag brukast ein kombibåt (MS «Lysefjord») i ruta. Båten er ein hurtigbåt med lastedekk, men har dårleg kapasitet og låg grense for vekt på køyretøy og maskinar. Kort køyrelem gjer det vanskeleg å køyre om bord ved høg- og lågvatn. Ruta startar i Stavanger, går innom øyane når det er last/passasjerar, vidare til Judaberg kor båten snur og vanlegvis går same veg tilbake. Ruta er utan faste tider, vi må ringe båten for å finne ut når den kjem. Dette tilbodet har vi berre tre dagar i veka. Dårleg kapasitet og lasteevne gjer at vi må leige eigen transport for kr 3-400.000 i året.
Eit av alternativa som samferdselstyret skal velja mellom, er anbefalinga til fylkesrådmannen; to ferjer som skal gå i Finnøy og ei mindre, tredje ferje som skal dekkja øyane våre og nordre del av det som i dag heiter Finnøysambandet (Nedstrand/Hebnes/Foldøy/Jelsa).
Båt berre tre dagar i uka
Det anbefalte forslaget om ei mindre, tredje ferje, som skal erstatte kombibåten «Lysefjord», er vi glade for. Denne ferja vil ha ein solid køyre-lem, som gjer at kaiane våre kan brukast utan ombygging, og den vil kunne ta med større lastebilar og maskinar. Gamle, rimelege ferjer, som kan byggast om slik, er lette å finne.
Vi er mindre glad for at forslaget berre inneheld båt tre dagar i uka. Vi som bur midt i fylket, skal framleis vere den største utkanten. Dette kan vi ikkje godta, og vi har derfor laga eit forslag kor den nye tredje ferja går på fjorden, i staden for å ligge til kai på Hebnes. Meirkostnaden er drivstoffet, båt og mannskap må ein likevel betale for. Slik kan øyane våre få same tilbodet som Foldøy har i dag; to anløp til dagen, sju dagar i uka, i tråd med vedtaket fylkestinget har gjort for Foldøy. Ruteforslaget har og med anløp av Nedstrand.
Slåss saman
Dette burde og kunne nord og sør saman slåss for. Men slik er det ikkje. Fastlandet i sambandet, Nedstrand og Jelsa, og Foldøy, slåss for å behalde ferjene som vil gjere større nytte internt i Finnøy. Samstundes som dei då stengjer oss ute frå å få ei dugande tredje ferje.
Alle vil gjerne ha ei kort og lettvint reise (transport), men det er stor forskjell på å kunne reise og ikkje kunne reise. For oss står kampen om å få reise, ikkje om korleis. Då meiner vi at dei som er landfaste og kan køyre, må vise storsinn ovanfor oss som ikkje kan.