Desse får den første store kontrakta på det nye sjukehuset
STAVANGER: Kruse Smith Entreprenør AS bygger parkeringsanlegg for 95 millionar, og sparkar med dette i gang bygginga av Nye SUS. Sjukehusdirektøren har mål om at dei fleste konktrakter er inngått i løpet av neste år.
– Dette er eit viktig prosjekt for oss. Eg er glad sjukehuset har vurdert kompetanse også og ikkje berre pris, seier Kristin Stømer Frafjord, regiondirektør i Kruse Smith Entreprenør AS.
Dei vil ha mellom ti og 30 personar som arbeider på byggeplassen under bygginga som startar i haust. Enteprenøren har ikkje tenkt å gi seg med parkeringshuset.
– Vi ventar på dei nye utlysningane som kjem no. Det er interessant, så vi blir nok med på dei større anboda også, men så må vi alltid vurdere om vi har kapasitet.
To parkeringshus
Det nye sjukehuset skal ha to parkeringshus, eitt for tilsette og eitt for besøkande.
I denne omgang var det parkeringshuset for dei tilsette som blei lyst ut. Kommunen har nemleg lagt krav om at dette må på plass før sjølve sjukehuset skal byggast fordi det skal kunne nyttast til parkering for arbeidarar og lagringsplass gjennom byggeprosessen.
Dei tilsette får 500 parkeringsplassar, besøkande får 400. Parkeringa for dei tilsette vil ligge eit stykke ifrå, med mål om at det ikkje skal bli for attraktivt å køyre. I tillegg skal det byggast sykkelhotell med plass til 1700 syklar.
Vil ha lokale aktørar Administrerande direktør Inger Cathrine Bryne ved Stavanger universitetssjukehus, er glad beste tilbydar var ein lokal aktør.
–Det ligg 3 milliardar skattekroner berre i bygga, så det er viktig at vi rigger ein konkurranse der lokale aktørar kan delta i anbodsrundene. Vi har valt å dele opp anboda fordi heile sjukehuset er så svaert at lokale aktørar ikkje ville hatt moglegheit til å delta, seier ho.
Det er styret i Helse Stavanger har bestemt at det skal leggast til rette for at lokale tilbydarar skal kunne delta i konkurransane om desse anboda.
Sjukehuset lyste difor ut anbodet på parkeringshuset gjennom ein metode som heiter Best Value Procurement, der tilbydarane blir vurdert etter kriterier som sjukehuset har fastsett i tillegg til pris.
Mellom anna la dei vekt på at entreprenøren må ha ei god løysing på rush-avviklinga i parkeringshuset. I Kruse Smith sitt tilbod foreslår dei ei løysing med einvegskøyring inn i parkeringshuset og skråparkering som skal gjere det enklare å parkere raskt.
Desse fem etreprenørane konkurrerte om å få bygge parkeringshuset: y SV Betong AS y NCC Norge AS y Jaerentreprenør AS y Kruse Smith Entreprenør AS y Backe Rogaland AS
– No vil anboda bli lyst ut fortløpande gjennom heile 2018, og i løpet av 2019 skal dei fleste kontraktene vere inngått, seier Bryne.
Dei største kontraktene vil vere på mellom 300 og 400 millionar kroner. Direktøren håper dei lokale er med i konkurransen også der.
– Ein skulle tru dei ville ha interesse for det. Vi skal i alle fall gjere det mogleg for dei å delta i konkurransen, men så er det også mykje som går føre seg med blant anna Rogfast no, så det er vanskeleg å seie korleis dei vel å prioritere.