Snart kan du lade elbilen frå lyktestolpar

STAVANGER: Allereie i september kan det bli mogleg å lade elbil frå lyktestolpar. Ideen er enkel og overraskande nytenkande, meiner Ola Elvestuen.

– Dette er ein av dei mest nytenkande ideane vi har fått inn, seier klima- og miljøminister Ola Elvestuen.

Han er i Stavanger med nøyaktig 330.675 kroner i støtte til å teste elbil-lading frå lyktestolpar.

Pengane frå støtteordninga Klimasats gjer at Stavanger får teste ladepunkt for elbil i lyktestolpar. Byen får råd til fem stykker i første omgang.

– Vi har ambisjonar om at den første skal vere på plass allereie i september, seier Gunnar Edwin Crawford, leiar av Smartbyen Stavanger.

– Dette er ein idé som vil spreie seg fort om ein får det til å fungere. Det vil kunne eigne seg over alt. Det er enkelt og overraskande nytenkande å bruke eksisterande infrastruktur på denne måten, seier Elvestuen.

Pengesummen er nok til å dekke halvparten av utgiftene til fem nye lyktestolpar. I tillegg skal kommunen og Lyse punge ut like mykje sjølv.

– Det er ikkje all verda med pengar, men vi fekk det vi søkte om. Så var vi gjerne litt beskjedne, seier Crawford.

Det er ikkje bestemt kor lyktestolpane skal stå. Onsdag møtte Crawford ministeren i Møllegata, ein av dei aktuelle kandidatane.

– Møllegata er ein av kandidatane. Kampen og Våland kan også vere aktuelt. Det må vere bynaert, og så må der vere mange elbilbrukarar.

Ei av dei største utfordringane, trur Crawford, er å få innbyggarane til å ville betale for å lade i desse lyktestolpane.

– Eg er spent på om innbyggjarane vil betale for å lade i stolpen. Vi må finne ut kor smertegrensa går i pris.

– Kva kan prisen bli?

– Det er ikkje bestemt, men det må vere konkurransedyktig i forhold til prisen folk allereie betalar til eigen straumleverandør. Men så vil jo gjerne involverte aktørar tene litt på det.

Truleg vil du kunne velje om du betaler via app eller nøkkelbrikke.

Trehusbyen

Stavanger skal skifte ut armaturar på lyktestolpane med nye LED-armatur. Ved å bytte til LED, frigjer ein også ein del straumkapasitet, og dette overskotet ønsker ein å nytte. Lyktestolpane tillet straumtilførsel heile døgnet.

– Denne utskiftinga på lyktestolpane skulle vi allereie gjere. Då er det genialt å ta dette i same slengen, seier Leif Arne Moi Nilsen (Frp).

KRISTIAN JACOBSEN Klima- og miljøminister Ola Elvestuen, til høgre, meiner lading frå lyktestolpar fort kan spreie seg til andre stader i landet. John Peter Hernes (H), fra venstre, Smartbysjef Gunnar Edwin Crawford og forretningsutviklar i Lyse, Trond Thorbjørnsen,...