Vil flytte bebuarane under bygginga av demenslandsby
STAVANGER: Rådmannen foreslo at bebuarane på sjukeheimen Ramsvigtunet skulle sleppe å flytte under ombygginga. Politikarane ville det annleis.
Levekårstyret stemte tysdag imot rådmannen sitt forslag om å la bebuarane på sjukeheimen ved Ramsvig bli buande under bygginga av demenslandsbyen.
Saka er ikkje endeleg avgjort, men skal vidare til behandling i kommunalstyret for miljø og utbygging og deretter formannskapet.
– Vi er litt i tvil om kva som er best, og akkurat dette er eit val mellom pest eller kolera. Anten må dei flytte litt på seg eller så må dei bu på ein byggeplass i minst eit år, sa Kåre Reiten (H) før møtet.
Må flytte
Ramsvigtunet består både av bufellesskap, sjukeheim og omsorgsbustadar. At bebuarane ved omsorgsbustadane må flytte, er allereie bestemt, og desse skal heller ikkje tilbake til Ramsvig etterpå.
Saka dreia seg om kor vidt bebuarane ved sjukeheim og
Felles forslag
Før møtet i levekårstyret, hadde fleirtalspartia eitt forslag og Ap eit anna som dei ville legge fram, men samtlege parti klarte å samle seg rundt eitt felles forslag. Dermed var det eit einstemmig vedtak som gjekk imot rådmannen.
Politikarane vil heller bygge alt i ein jafs og flytte bebuarane til andre sjukeheimar under byggeprosessen, men med eit atterhald:
«Hvis det ikke lar seg gjøre av praktiske grunner og at det derfor bygges ut i 2. trinn (som rådmannen foreslo, journ. anm), er det svaert viktig at beboerne blir godt ivaretatt med hensyn til støv, støy og andre ulemper det medfører å bo på en byggeplass.»
Ap fekk bakeri
Ap hadde på førehand varsla at dei ville foreslå å be rådmannen sjå på korleis bakeri og kolonial kunne bli ein del av demenslandsbyen.
I vedtaket heiter det at ein ved utarbeidinga av programmet for senteret, må ta omsyn til: «at senteret skal tilby forskjellige aktiviteter som f.eks. kafé/ restaurant, butikk, lokaler for fritidsaktiviteter m.m.. Senteret bør også ha eget kjøkken.»
Forslaget frå rådmannen tok ikkje stilling til om demenslandsbyen faktisk vil bli realisert.
– Føresetnaden for alt er at det i haust blir lagt inn tilstrekkeleg med midlar i budsjettet, sa levekårsjef Eli Karin Fosse før møtet.
Dette var ikkje tydeleg nok, meinte politikarane. Dei vedtok ein uttale som viste til at det er vedtatt midler til å bygge senteret. Dette må følgast opp og senteres skal byggast, er den tydelege beskjeden frå eit samla levekårstyre.
Politikarane er dessutan samde om at senteret må heite noko anna enn demenslandsby og vil at bebuarar og tilsette kan vere med å finne namn.
Klar til 2023
Bygginga skal finansierast med midlar frå staten gjennom Husbanken. Stavanger kommune ser for seg at Ramsvigtunet sykehjem, bufellesskap og omsorgsbustader i 2023 er blitt bygd om til ein landsby for dei demente. Mellom 90 og 97 demente skal leve slik dei hugsa at ting var då dei var unge.