Har bygd 16 nye ladestasjonar som folk ikkje får bruke
STAVANGER: Kommunale ladestasjonar står ubrukte og med avskrudd straum på Storhaug. Samtidig har privatpersonar problem med å få lada elbilen på lovleg vis.
– Det er alt for dårleg. Kommunen har, med folks skattepengar, bygd 16 nye ladestasjonar som folk ikkje får bruke, seier Torfinn Ingeborgrud (MDG).
Heimehjelpa på Storhaug flytta i april vekk frå lokala sine i Ericstrupsgate. Her har dei tilsette hatt gode moglegheiter til å lade elbilen, men etter at dei flytta er ikkje ladestasjonane lenger i bruk. Det blir opplevd som eit paradoks for bebuarar på Storhaug.
– I går kveld køyrde eg rundt og leita etter ein stad å lade bilen min. Mange av ladestasjonane fungerer ikkje, seier Nick Hegreberg.
Han flytta nyleg til Storhaug. Tidlegare har han hatt moglegheit til å lade heime, men no eig han ikkje parkeringsplass og har difor ikkje privat lading.
–Det blir så mykje stress at eg no vil selge elbilen og heller skaffe bensinbil eller hybrid. Eg reknar med eg ikkje er den einaste som opplever det som einaste utveg, seier han.
– Alvorleg mangel
– Eg trur det hadde løyst mykje om privatpersonar kunne brukt dei kommunale ladestasjonane som allereie finst ved heimesjukepleien, seier Hegreberg.
Det er Ingeborgrud samd i, og har tatt opp situasjonen ved i Kommunalutval for miljø og utbygging.
I eit spørsmål til administrasjonen spurte han om kommunen kan opne for at bebuarar i området får bruke ladestasjonane.
Rådmannen svarte då at dei 16 ladeplassane foreløpig ikkje kan brukast fordi området kanskje skal brukast til riggeområde frå 2019 av.
– Det er per dags dato ikkje avklart kva bygget skal brukast til, og om dei framtidige brukarane av bygget vil ha behov for desse ladepunkta. Bygget er i dårleg forfatning og vil sannsynlegvis rehabiliterast.
Ingeborgrud meiner svaret er for dårleg.
– Det må vere mogleg å opne dei i mellomtida. Sidan det er snakk om saktelading er ikkje kostnadane knytt til straumen så høge, så eg meiner dei som bur i sona bør få lade der med gratis straum inntil vidare. Dei har sjølv betalt for ladestasjonane gjennom skattepengar, og no har dei behov for å bruke det.
Kommunen bekrefter til Aftenbladet at ladestasjonane står ubrukte, og opplyser at dei har skrudd av straumen på dei. Direktør for bymiljø og utbygging i Stavanger kommune, Rune Kommdal, seier dei ser på ei løysing.
– Dette er noko vi ønsker å få til, men vi må gjere det på riktig måte. Vi kan ikkje berre opne og seie «versågod, gratis straum». Vi må finne ut korleis vi kan få til dette på ein måte som er praktisk gjennomførbar utan at det har for store utgifter.
Han seier dei kjenner til at enkelte finn kreative løysningar med kablar ut vindauget.
– Då burde ein ikkje kjøpt seg elbil for det er i utgangspunktet livsfarleg.
– Vent med å kjøpa
– Vi seier gjerne at dersom du ikkje har tilrettelagt for lading på jobb eller moglegheit for å lade heime, bør du vente med å kjøpe elbil, seier Petter Haugneland, kommunikasjonsleiar i Elbilforeningen.
Dei har mykje erfaring med at eksisterande ladestasjonar i Stavanger ikkje fungerer.
– Med så mange elbilar som det er i dag, blir ladepunkta hardt brukt. Mange av ladestasjonane er så gamle at dei ikkje er bygd for denne bruken. Det er stort behov for å bytte ut og oppgradere gamle ladestasjonar og bygge ut fleire.
Antikvariske ladestasjonar Stavanger parkering har i dag 21 ladestasjonar langs gata samt 58 knytt til parkeringshall. Dei er godt kjend med at ikkje alle fungerer som dei skal.
– Vi var tidleg ute med å skaffe ladestasjonar, og konsekvensen er at dei no begynner å bli antikvariske. Mange er gamle, dei eldste frå rundt 2011. No forsøker vi å skaffe reservedelar fram til vi får nye ladestajonar, seier Christian Tønnevold, leiar i Stavanger parkering.
– Det kjem ei storstilt utbygging no, der planen er å anten skifte ut eller skaffe over 200 nye ladestasjonar. I tillegg kjem det mellom 300 og 400 ladestasjonar ved Jernbana, primaert for drosjer.
– Når skjer denne utbygginga? – Vi håper å få det til i løpet av hausten ein gong. No er vi i sluttfasa med å finne leverandørar, seier Tønnevold.