Kirkens Bymisjon opnar kafé med «søppelmat»
SOLA: Kirkens Bymisjon opnar ein kafé med mat som normalt ville gått i søpla. Det gir ein kreativ meny.
Kirkens Bymisjon får 2,1 millioner kroner frå ExtraStiftelsen til å starte kafé på Sola. Heilt ordinaer blir den på ingen måte.
– Mest mogleg av maten skal lagast med mat som elles ville blitt kasta i søpla. Så vil vi lage ein kreativ meny med utgangspunkt i maten vi får inn, seier Maggi Hatløy, dagleg leiar i Kirkens Bymisjon Stavanger.
– Målgruppa vår er dei med mykje tid, ikkje nødvendigvis dei med mykje pengar. At vi baserer oss på overskotsmat, er truleg med på å gjere det enklare å selje til rimelege prisar.
Matsentralen
Kafeen har inngått ein avtale med den nystarta Matsentralen Rogaland. Aftenbladet skreiv i desember om matsentralen som skal forsyne organisasjonar med overskotsmat. Evangeliesenteret, Frelsesarmeen, Stavanger kommune, Hjerte for Sandnes/ Pinsemenigheten Klippen og IVAR hadde då gått saman om å kartlegge behovet.
– Vi har funne ut at behovet er om lag 200 tonn mat i året, sa styreleiar Vidar Solevåg.
Matsentralen vil halde til i Hoveveien i Sandnes og startar opp i løpet av hausten.
Arbeidstrening
Bymisjonen samarbeider med Sola kommune om å opne kafeen. Planen er at dei som jobbar der skal vere ein miks av frivillige og personar som er i arbeidstrening gjennom Nav. Kafeen skal ligge på Stangelandsenteret og målet er å opne i januar.
– Kirkens Bymisjon er relativt nyetablerte på Sola. Vi har hatt éin tilsett der frå første januar i år. Midlane frå stiftelsen gjer at vi no får råd til å tilsette ein kjøkkensjef i kafeen, og så håper vi å kunne tilsette fleire etter kvart.
Kafeen er i utgangspunktet eit treårig prosjekt, men Hatløy håper den kan bli permanent.
– Midlane frå ExtraStiftelsen er ein god start, og så har vi også andre søknader ute og håper fleire vil støtte dette.
– Betyr mykje
– Saman med frivillige skal det skapast eit godt miljø der dei som er på arbeidstrening opplever tilhørsle. Kafeen vil vere open for alle, så dette vil vere eit spennande tilbod til lokalabefolkninga også, skriv Hege Bjørnsdatter Braaten, kommunikasjonssjef i ExtraStiftelsen, i ei pressemelding.
– Dette er eit glimrande døme på at aktørar som organisasjon, frivilligheit og kommunen jobbar saman for å få fleire ut i jobb. Vi har støtta fleire liknande prosjekt andre stader i landet, og veit at dei betyr veldig mykje for deltakarane. Og så er det ekstra spennande at dei også trekk inn miljø- og forbruksperspektivet ved å nytte overskotsmat i produksjonen, seier ho.
ExtraStiftelsen mottek 6,4 prosent av overskotet til Norsk Tipping og fordeler dette vidare til prosjektstøtte til frivillige helseorganisasjonar. I år mottek stiftelsen 302 millionar kroner.