Gje framtidsbonden sitt eige fagbrev!

LANDBRUK: Eit fagbrev å henge opp på veggen heime er betre enn eit kompetansebevis som blir liggande i ei skuff.

Rogaland blir i ei rekke samanhengar kalla matfylket i landet. Landbruksnaeringa her består av om lag 5300 gardsbruk, noko som utgjer 10.000 årsverk. På same tid hadde ikkje Øksnevad vidaregåande skule nok søkarar i 2017 til å danne ein klasse på Vg3 landbruk, agronom.

I dagens skulesystem går ein eit treårig løp på naturbruk for å bli agronom. Etter bestått eksamen får ein eit kompetansebevis som stadfesting på fullført utdanning. Dette kompetansebeviset får ein i andre fagutdanningar etter å ha fullført Vg2 og er klar til å gå ut i laere hjå bedrifter, men her betyr det ikkje at ein er utdanna. Dette stiller me i Bygdeungdomslaget spørjeteikn ved.

Ved nokre utvalde skular i landet, blant anna på Melsom vidaregåande skule i Vestfold, har det blitt gjennomført eit pilotprosjekt med fagbrev i agronomi. Her har elevane gått identisk laereløp som ved andre fagbrevutdanningar. Med to år på skulebenken og toårig laeretid i forskjellige bedrifter, gjekk dei opp til fagprøve og fekk fagbrev som agronomar. Responsen frå prosjektdeltakarane i Vestfold var bra, men prosjektet blei likevel ikkje vidareført.

Me i Rogaland Bygdeungdomslag meiner det er for gale at Øksnevad vgs, som ligg i hjartet av Norges matfat, ikkje har nok søkarar til fylle ein klasse Vg3 landbruk. Me har vore i kontakt med dei, og dei skriv at fleire av elevane deira vel Vg3 Naturbruk i staden for Vg3 Landbruk, agronom. Dei trur at årsaka til dette kan vere at ein på naturbruk får generell studiekompetanse og dermed har moglegheit til å søke høgare utdanning. Vel ein å gå landbruk, får ein verken studiekompetanse eller fagbrev. Dette gjer ein mindre attraktiv på jobbmarknaden då naeringslivet ofte etterspør fagbrev eller generell studiekompetanse.

Me trur at om det kjem fagbrev inn i landbruket, vil talet på ungdommar som vel utdanninga stige, me får faerre ufaglaerte bønder, og kompetansen vil dermed verta høgare enn den er i dag. Dermed trur me at utdanninga og yrket også vil få meir status i samfunnet elles. Ved å innføre fagbrev kan agronomane endeleg få eit fagbrev å henge opp på veggen heime, og ikkje eit kompetansebevis som blir liggande i ei skuff.