Utfører tilsyn på ulykkesferja i dag
FORSAND: Sjøfartstilsynet skal undersøke historikken til 40 år gamle MF «Eid» og kva planar Fjord1 har for vidare oppfølging.
Utover tilsynet i dag er det ikkje bestemt kven som skal granske ulykka vidare. Det kan hende Statens havarikommisjon for transport vel å gå inn i saka, og då er det dei som vil gjennomføre vidare undersøkingar. I går jobba havarikommisjonen med å samle inn informasjon om ulykka.
– Vi har ikkje tatt stilling til om vi vil gjere vidare undersøkingar, men ventar å vite dette i løpet av mandag, seier Dag Sverre Liseth, avdelingsdirektør for sjøfart.
– Sjølova skil mellom ulykker som skal undersøkast, til dømes ved omkomne, og ulykker som vi kan velje å undersøke. Så langt kan vi ikkje sjå at dette er ei sak som pliktar oss å undersøke. Då kjem det an på kor stort laereutbyte det vil vere i ei slik undersøking, og kva som blir gjort av andre etatar.
Også Nordsjø-/miljøseksjonen i politiet er varsla, ifølgje NRK. I går ettermiddag var det planen å slepe ferja til havna ved GMC Maritime på Buøy i Stavanger. Mannskapet skal få oppfølging dei naermaste dagane.
Det var maskinhavari som førte til røykutviklinga på ferja, opplyser Fjord1, men brannårsaken er foreløpig uklar. Fleire av passasjerane som Aftenbladet har snakka med, seier dei høyrde ein eksplosjon.
– Eit spørsmål er om det er snakk om brann eller røykutvikling. Det veit vi først etter gransking, seier Liseth.