Sjukepleiarar sa opp etter at Attendo tok over
STAVANGER: Ni tilsette ved Boganes sykehjem har sagt opp etter at Attendo tok over drifta i april.
– Ein situasjon med utstrakt bruk av vikarar har ført til alvorlege avvik. Vi opplevde ei auke i klager frå pårørande, seier ein tidlegare tilsett til Aftenbladet.
– Eg valde å begynne å jobbe på Boganes fordi eg høyrde det var så god kvalitet. Etter at Attendo tok over, opplever eg ikkje lenger at det er slik, seier ein annan tilsett.
Dei er to av sjukepleiarane som har sagt opp jobben etter at det private firmaet Attendo Omsorg tok over drifta av sjukeheimen i Gauselvågen i april. Fram til då var det Aleris Omsorg som drifta sjukeheimen, men dei blei utkonkurrert då kommunen på ny lyste ut anbod.
Uheldig, men ikkje ulovleg Det jobbar om lag 170 personar på sjukeheimen, av desse er 16 sjukepleiarar. I tillegg er det leigd inn tre sjukepleiarar frå vikarbyr og åtte sjukepleiarar som fast tar ekstravakter.
Sidan april har seks sjukepleiarar sagt opp, dei fleste med verknad frå august, i tillegg til at fungerande dagleg leiar og to teamleiarar sluttar.
Tilsette som Aftenbladet har snakka med, fortel at lønnsvilkåra blei mykje dårlegare med den nye leverandøren, og at dette var hovudårsaken til at dei valde å slutte.
– Vi gjekk frå fast utbetalt lønn til variabel lønn. Alt av tillegg for nattevakter og kveldsvakter blei gitt som etterbetaling, noko som førte til at vi ikkje lenger kunne vite kor mykje vi ville ha i lønn kvar månad, seier ein av dei som har sagt opp.
Nina Horpestad, fylkesleiar i Norsk sykepleierforbund, har vore i kontakt med sjukepleiarane som sa opp.
– Det Attendo gjer er ikkje ulovlg, men uheldeg. Overgangen til Attendo har gitt dårlegare lønnsvilkår enn ved andre sjukeheimar i kommunen. Attendo har ikkje vore etablert i Stavanger-regionen før, og er nok ikkje kjent med situasjonen her. Aleris (som tidlegare drifta sjukeheimen, jorn.anm) jobba meir i samsvar med lønsvilkåra som Stavanger kommune har, seier Horpestad.
Det private firmaet driftar på vegne av kommunen, og Stavanger kommune har difor ansvar for kvaliteten. Sidan april har dei mottatt melding om eitt alvorleg avvik. Dette er under behandling i kommunen no.
Eit alvorleg avvik
Vi kan ikkje sjå at det er auke i klager frå pårørande eller at dei får fleire klager enn vi får ved andre sjukeheimar. Vi er ikkje uroa for tilbodet og har ingen grunn til å tru at kvaliteten ikkje er god nok, seier Eli Karin Fosse, levekårsjef i kommunen.
Stavanger kommune, Attendo og leiinga ved Boganes sykehjem har hatt møte for å diskutere situasjonen.
– Vi har hatt møter om utfordringane og situasjonen med oppseiingar. Det var ein del uro blant dei tilsette i overgangen til ny leverandør, men vi opplever at det er i ferd med å stabilisere seg, seier ho.
Det er politisk vedtatt at sjukeheimen skal vere drifta privat. Då kontrakta med Aleris gjekk ut i 2016, vedtok politikarane i levekårsstyret i Stavanger at drifta for sjukeheimen framleis skulle konkurranseutsettast. Det nye denne gongen var at konkurransen om å få drifte sjukeheimen ikkje dreia seg om pris, men om kven som kunne tilby best kvalitet til den prisen som kommunen allereie hadde fastsatt.
Dette svarer Attendo
I kontrakta med Stavanger kommune har Attendo forplikta seg til ulike krav. Dei har blant anna kontraktfesta ei anna fordeling av sjukepleiarane enn Aleris hadde, med auka sjukepleiebemanning på kveld og helg. – Vi meiner endringane vil føre til auka kvalitet. I kontrakta legg vi vekt på utvikling av aktivitetsog kulturtilbodet, og meir normalisering av kvardagslivet på sjukeheimen. Dette kjem i tillegg til den gode medisinfaglege kvaliteten som allereie er etablert. Vi gjennomfører også større investeringar i bygg og interiør, blant anna ombygging av kafe med bibliotek og aktivitetsrom, seier Geir Hansen, marknadsog kommunikasjonsansvarleg i Attendo Norge.
– Endringar har dessverre skapt ein del uro på Boganes sykehjem og vi trur at organiseringa av sjukepleiartenesta er den største kimen til uroa. Vi tar det på største alvor og beklagar at nokre av dei tilsette ikkje ønsker å vere med vidare. Det er viktig å understreke at vi enda ikkje har endra på noko i organiseringa etter at vi tok over. Ingen slutta i stillingar før 1. august, men sommaren kunne vore noko betre planlagt. Vi meiner vikarbruken ikkje er større enn normalt og at verksemda er innanfor ramma for det som er forsvarleg, seier han.
Attendo er i gang med tilsettingsprosess på fire sjukepleiarar. Teamleiarane og fungerande dagleg leiar er allereie funne erstatning for, både internt og eksternt.
Attendo følger tariffavtale mellom Norsk sykepleierforbund, Fagforbundet og NHO. Tariffavtalen er den same som Aleris hadde, men der var det blant anna ein lokal avtale med lønnsstige.
Dei tilsette har ikkje gått ned i lønn, totalt sett, og Hansen presiserer at ingen vil gjere dette.