Bomringen påverkar val av barnehage
NORD-JAEREN: Bomringen er avgjerande for kva barnehagar foreldre i Sandnes vil ha borna sine i, truleg og i dei andre kommunane.
– Vi veit det er 12 barn i Tananger som har fått barnehageplass på andre sidan av bomringen. Det kan vere snakk om nokre fleire, men det trur eg vi skal klare å finne ut av ganske raskt, sa Ole Ueland (H), ordførar i Sola kommune, til NRK mandag.
– Då talet er så lite, må det vere mogleg å finne ei løysing for desse familiene. Eg tenker vi bør sjå på ei ordning der ein får refundert utgifter for dei familiane det gjeld, seier han til Aftenbladet.
Jobbar med oversikt
I Sandnes kommune har dei foreløpig ikkje tal på kor mange som må forbi bomringen for å levere i barnehage, men dei opplever at bomringen hadde påverknad på kor folk søkte barnehageplass.
–Tilbakemeldinga vi fekk frå opptakskontoret før sommaren, var at foreldre har vore opptatt av dette når dei set opp ønsker for barnehagar. Vi jobbar med å få oversikt over kor mange som må passere bomring for å levere til barnehage. Vi veit ikkje så mykje meir foreløpig, seier barnehagesjef Torill Jacobsen Kind.
Ho kjenner ikkje til kor vidt foreldre har bedt om å bytte barnehage for å unngå bomringen.
Barnehagesjef i Stavanger kommune, Monica Buvig Stenseth, ser det ikkje som usannsynleg at bomringen kan ha hatt innverknad på kor foreldre søkte om barnehageplass.
–Vi har ingen dokumentasjon på dette, men det er sannsynleg at det er likt som i Sandnes. Vi har tenkt at det kan ha hatt påverknad. Kor vidt bomringen får folk til å søke om barnehagebytte har vi ikkje grunnlag for å svare på, men det er i alle fall ikkje registrert auke i søknader. Vi har alltid ein del søknader om bytte, og oftast kjem det av at folk har barnehageplass langt unna eigen bustad, seier Buvig Stenseth.
Bomstøtte
I Sola blir det lagt fram ei sak om bomstøtte til låginntektsfamiliar i neste kommunestyremøte. I Stavanger har bystyret allereie vedtatt at ein må sjå naerare på bomstøtte til barnefamilier.
Ap, Høgre, Venstre, KrF, MDG og Raudt fekk forrige veke fleirtal for eit vedtak som ber rådmannen legge fram ei sak om støtte til familier med låg betalingsevne og som er avhengige av bil for å køyre til barnehage og jobb.
I vedtaket viser dei til erfaringar frå Skien kommune. I Skien satte dei i 2017 av ein million kroner til ei slik støtteordning. Der rekna dei med at 400–500 familiar ville få innvilga ei støtte på 1890 kroner i året, ifølgje Telemarksavisa.
–Det er fleire lavtlønna i Stavanger enn i Sola. Dermed kan det bli snakk om ein god del fleire familier her som vil trenge økonomisk støtte, seier Kari Nessa Nordtun, gruppeleiar i Stavanger Ap.
– Bompengar er ei dårleg løysning å finansiere infrastruktur på, men vi har ingen alternativ no. Dermed må vi sette inn tiltak for å verne om dei som blir hardast ramma, nemleg dei med låg lønn som ikkje har andre val enn å køyre bil. Ap har lagt fram forslag om slik støtte til lavinntektsfamiliar fire gongar, men først no fekk vi fleirtal, seier ho. Protokollar viser at det var i bystyremøter i desember, i februar, april og september i år.