Film- og barneprogram på Kapittel
LITTERATUR: Også barn, unge og filminteresserte får sitt på årets Kapittel. Lene Ask lanserer ny bokserie, og i helga kan du møta skaparen bak bøkene om «Jakob og Neikob».
«Bokmerke» er barneprogrammet på Stavangers litteraturfestival Kapittel. Kvar formiddag på vekedagane får inviterte barnehagar og skuleklassar møta forfattarar, og til helga blir det litteraturopplevingar for heile familien både i Stavanger, Sandnes og Randaberg.
Dei som har sett saman barneprogrammet har tolka årets Kapittel-tema «Samhald» til å handla mykje om venskap og om å høyra til, når me snakkar om barn. Dermed kjem Kari Stai, som nå er aktuell med si femte bok om vennene Jakob og Neikob.
Og så kjem Lene Ask, opphavleg frå Stavanger, for å lansera første bok i det som skal bli ein serie på fem bøker under tittelen «Mysteriet Mai». Bøkene handlar om Mai, som har vore usynleg så lenge ho kan hugsa. Men så dukkar ein ukjent gjest - Juni - opp i hotellet der Mai bur, og eit spesielt vennskap oppstår.
Eldre barn og unge kan laera både om krig og flukt, norsk slavehandel og klima og miljø.
Kapittel har også tradisjon for å visa dokumentarfilm, og i år har festivalen plukka ut ni stykke. Blant dei er «Jeg vil bo i mitt navn», ein dokumentarfilm om forfattaren Tomas Espedal.
«Minding the Gap» handlar om tre unge skatarar på terskelen til vaksenlivet, og filmen har eksklusiv førpremiere i Stavanger i samarbeid med Bergen internasjonale filmfestival (BIFF).
Ein tredje film som blir trekt fram på filmprogrammet, er «Patrimonio», som handlar om den vesle fiskarlandsbyen Todos Santos i Mexico. Der reiser innbyggjarane seg mot eit multinasjonalt utbyggingsprosjekt som skal etablera 5000 hus.
Kapittel film viser også kortfilmen «Sykkelfugl» av Odveig Klyve og Kari KlyveSkaug. Filmen handlar om ei afghansk jente på eit asylmottak, og er filma på Dale.