Trur sentrale lokalpolitikarar vil trekke seg
STAVANGER: Same kva KrF bestemmer seg for å gjere, kan konsekvensen bli at viktige lokalpolitikarar vel å trekke seg før neste val. Det seier valforskar Hilmar Rommetvedt.
– KrF kan risikere å miste sentrale politikarar lokalt, både dersom dei dannar mindretalsregjering saman med Ap og Sp, men også dersom dei vel å gå inn i dagens regjering. Partia er midt i nominasjonen til kommuneval. Det blir spennande å sjå kven som er villige til å stå på listene no, seier Hilmar Rommetvedt, professor og statsvitar ved Universitetet i Stavanger (UiS).
2. november har KrF ekstraordinaert landsmøte. Då skal 193 delegatar frå heile landet avgjere om dei vil felle Erna Solberg si regjering og danne ny regjering med Ap og Sp, eller om dei vil gå inn i dagens regjering.
– Blant dei som taper landsmøtevoteringa, er det ein sjanse for at det påverkar motivasjonen til å halde fram. Samtidig går samarbeidsmønster i kommunane allereie i dag på kryss og tvers, og det vil truleg vere kommunar som samarbeider i motsett retning enn det som blir resultatet på landsnivå.
Samarbeid med SV Rommetvedt meiner det er heilt ope kva som blir resultatet på landsmøtet. Om partiet går inn for ei regjeringsdeltaking, gjenstår det framleis å gå inn i regjeringsforhandlingar.
Vel partiet å ta eit steg til venstre, ligg det an til å bli ei mindretalsregjering. Dermed vil dei trenge eit tett samarbeid med parti utanfor regjeringa. Tysdag kveld seier partileiar Knut Arild Hareide til VG at han meiner det er naturleg med eit tett samarbeid med SV.
– Før valet sa tre av fire KrFveljarar at ein under ingen omstende bør gå i regjering med Frp eller SV, så eit tett samarbeid vil nok vere tungt å svelge anten det er snakk om Frp eller SV, men då sjølvsagt av forskjellege veljarar. Ei mindretalsregjering vil forsøke å hente støtte frå begge kantar. Høgresida har sagt dei ikkje kan rekne med støtte frå den kanten, og på kort sikt vil dei nok stå på det, men på lengre sikt kan nok det endre seg, seier Rommetvedt.
422 nye medlemmar
Etter at KrF-leiar Knut Arild Hareide fredag oppfordra partiet om å samarbeide med Ap og Sp, har 58 medlemmar meldt seg ut av partiet, medan 684 personar har meldt seg inn, ifølgje Knut Arild Hareide. Berre i løpet av fekk partiet 217 nye medlemmar. Samtidig har partiet De Kristne fått 135 nye medlemmar sidan august og dei meiner bråket i KrF er årsaka.
– Desse tala er det vanskeleg å tolke for mykje inn i. Det har blitt nemnt at det pågår ei vervekampanje også.
– Må ta grep
Rommetvedt har inntrykk av at ein stor del av veljarmassa lener seg meir mot høgre enn partileiar Hareide gjer. Han er likevel ikkje sikker på kva som er det luraste for partiet, strategisk sett.
– Det er eit frykteleg dillemma og sanneleg ikkje enkelt å seie. Det har utvikla seg ein situasjon der dei fleste i partiet meiner ein må ta eit standpunkt og velje retning. Å halde det så ope som partiet har gjort til no har blitt meir og meir problematisk. Dagens måling i NRK viser at partiet er på den dårlegaste oppslutninga dei har hatt på så lenge eg kan hugse. Dei kjenner nok at dei må ta grep for å kome seg ut av situasjonen.
I den ferske NRK-målinga hamnar KrF på 3,7 prosent oppslutning, det vil seie under sperregrensa på 4 prosent.
– Partiet risikerer å tape veljarar same kva side dei stiller seg på no, men så er spørsmålet om dei klarer å vege opp for dette tapet med å appellere til nye veljarar.