Arbeidsutvalet i Nye Stavanger vil ha språknøytral kommune
NYE STAVANGER: Arbeidsutvalet i Nye Stavanger vil ha ein språknøytral kommune. – Med dette får vi fridom til å velje, samstundes som ingen må bruke ei målform av tvang, seier Elin Schanche (Høgre).
Arbeidsutvalet for fellesnemnda består av tre representantar frå kvar av kommunane Stavanger, Rennesøy og Finnøy. Onsdag diskuterte dei den nye kommunen si haldning til målform. Samtlege av politikarane meiner kommunen skal vere språknøytral.
15. oktober skal fellesnemnda for nye Stavanger kommune diskutere saka. Der blir det gjort endeleg vedtak.
– Fridom til å velje
Medan Stavanger er bokmålskommune, er Rennesøy nøytral og Finnøy nynorsk-kommune.
– Med dette får vi fridom til å velje, samstundes som ingen av dagens kommuner må bruke ei målform av tvang. No kjem det også til å bli jobba vidare med målforma sin plass i skule og liknande, og kanskje kan det vere lurt å forsøke å lage ein målplan, seier Elin Schanche (Rennesøy Høgre).
– Trur du dette fører til skilnader i praksis mellom Rennesøy, Finnøy og Stavanger?
– Eg trur nok Finnøy vil halde mest på nynorsken. Samtidig har vi nynorskklasser i Rennesøy og Stavanger også. Over tid vil nok praksisen i målform jamne seg meir ut.
Styrke nynorsken Arbeidsutvalet ønsker også ei utgreiing som ser på tiltak som kan styrke nynorsken, og som gir retningslinjer for bruk av målform i den nye kommunen. Her vil dei til dømes sjå på målform i skulen og om kommunetilsette skal måtte svare på same målform som den som kontakta dei skriv.
– No vil vi kunne lage meir målretta planar. I Rennesøy har vi ikkje hatt så aktivt forhold til dette, og det trur eg betrar seg når vi får ein betre plan, seier nestleiar i utvalet, Jostein Eiane (Rennesøy KrF).
To av Finnøy sine representantar, Odd Bleie (Sp) og Henrik Halleland (KrF), meinte at ein også burde legge inn eit punkt om å innføre krav om 25 prosent nynorsk i kommuneadministrasjonen, det vil seie same ordning som i statlege etatar, men fleirtalet meinte at prosjektrådmannen sitt forslag gjekk langt nok.
Medan arbeidsutvalet berre kjem med ei tilråding til fellesnemnda, skal fellesnemnda fatte endeleg vedtak i saka mandag 15. oktober. Her kan det fort kome andre forslag på bordet. SV, som ikkje er representert i arbeidsutvalet, har tidlegare sagt at dei meiner Nye Stavanger bør bli nynorskkommune.
– Vi synest det er viktig at Nye Stavanger skal ha ein felles identitet. Å gå inn for nynorsk vil vere ei raus haldning ovanfor for Finnøy og til dels Rennesøy, har Eirik Faret Sakariassen, gruppeleiar i Stavanger SV, tidlegare uttalt til Aftenbladet.
Onsdag seier han at partiet ikkje har bestemt seg for eit alternativt forslag enda, men har éitt punkt dei meiner må med.
– Vi ønsker at ein i alle fall skal ha nynorsk som målvedtak, det vil seie at når staten kontaktar Stavanger, så gjer dei det på nynorsk. Det håper vi kan vere eit godt kompormiss for oss, og så kan det heller vere språknøytralt for tilsette i kommunen.
Då fellesnemnda skal møtast 15. oktober, skal dei også ta stilling til kor vidt den nye kommunen skal vere organisert i bystyre eller kommunestyre. Arbeidsutvalet tok ikkje stilling til dette, men sender vidare eit forslag med to alternativ: At det øvste politiske styringsorganet skal heite bystyre eller at det skal heite kommunestyre.
Stavanger, Rennesøy og Finnøy blir éi kommune frå januar 2020.