Målforma er viktigare enn kommunevåpenet
NYE STAVANGER: Målet må vera at det er like lett å vera nynorskbrukar som bokmålsbrukar.
Det var med interesse eg las innlegga i Aftenbladet av guten Eirik Faret Sakariassen 29.9. frå SV, og mannen Christian Wedler 3.10. frå Frp om Nye Stavanger og målform.
Sjølv om eg har nynorsk som hovudmål, ser eg at ein må vera stor optimist dersom ein trur at Nye Stavanger vel å vera ein nynorsk kommune.
Mitt syn ligg på linje med det Rennesøy mållag skriv i Aftenbladet den 5. d.m. at det er naturleg at kommunen melder seg nøytral. Men då er det viktig, som dei skriv, med ein målbruksplan for kommunen.
Realiteten var bokmålskommune Erfaring viser at dei fleste språknøytrale kommunar, skriv det meste på bokmål. Sjølv har eg erfaring frå Gjesdal kommune som i ordet er språknøytral. Dei siste åra eg budde der, var Gjesdal i realiteten ein rein bokmålskommune. Den siste i administrasjonen som nytta god nynorsk, var rådmann Eide.
Då kommunen blei oppmoda til også å nytta nynorsk, svara dåverande ordførar at han ikkje kunne skriva nynorsk, og dermed ikkje kunne påleggja andre i administrasjonen om å gjera det.
Ordføraren var vaksen opp i ein nynorsk kommune og gått på skule der. I parentes bemerka: Det er underleg kor fort ein kan gløyma ting, saerleg nynorsk.
Utarbeida ein målbruksplan
Skal Nye Stavanger bli språknøytral, er det saers viktig å utarbeida ein målbruksplan, slik at kommunen blir i realiteten nøytral. Målet for Nye Stavanger må vera at det er like lett å vera nynorskbrukar som bokmålsbrukar.
Eg støttar Rennesøy mållag som foreslår at Nye Stavanger, sjølv om kommunen blir språknøytral, ber om statlege skriv på nynorsk. Målforma i kommunen er, etter mitt syn, viktigare enn kommunevåpenet.