Vil gi dei eldre meir tv, Skype og sosiale medium

STAVANGER: Meir tv, Skype og sosiale medium, betre informasjon til pårørande og fleire frivillige. Slik skal Stavanger gi betre aktivitetar på sjukeheimar.

For det meste meiner pårørande ved alders- og sjukeheimane i Stavanger at deira kjaere får eit godt tilbod, viser ein fersk rapport frå Stavanger kommune. Politikarane er likevel langt frå nøgde.

– Dette er ei undersøking som vi kan glede oss over, med så mange punkt der ein skårer bra. Mange dyktige tilsette gir eit godt tilbod til brukarane. Så er det spesielt eitt område vi må bli betre på, sa Erlend Jordal (Høgre) då saka var oppe i kommunalstyret for levekår tysdag.

Aktivitetane kjem klart dårlegast ut, både på spørsmålet om kor vidt dei passar for bebuarane og om tilboda blir gitt ofte nok (sjå faktaboks). Det gjeld i størst grad dei sosiale aktivitetane, men også fysiske aktivitetar har forbetringpotensiale.

–Det er to omsyn vi må ta med tanke på aktivitetar i sjukeheimar. Dei som er der, er det nettopp fordi dei er svaert sjuke. Dei treng mykje omsorg og klarer ikkje vere med på aktivitetar heile tida. Samtidig er det viktig å gi dei eit tilbod så dei føler dei kan bruke både hovud og hender. Det er ein krevjande balansegang, sa Jordal.

Meir Skype og tv

I kommunalstyret for levekår fekk Høgre gjennomslag for å be kommunen sjå på moglegheitene til å ta i bruk nye teknologiske hjelpemidlar på sjukeheimane. Dei eldre skal i større grad bruke sosiale medium, Skype, tv og liknande.

Høgre og dei andre fleirtalspartia Venstre, KrF, Frp og Pensjonistpartiet, ønska også at undersøkinga skal gjennomførast kvart fjerde år, og at det må bli gitt betre informasjon til pårørande om dei aktivitetane som allereie eksisterer.

I tillegg foreslo dei at frivilligheita må vere ein viktig del av arbeidet med å skape fleire aktivitetar. Eit samrøystes kommunalutval stilte seg bak alle desse forslaga.

– Det er viktig at satsinga på teknologi ikkje går ut over bemanninga ved sjukeheimane, at det er nok hender når vi avløyser dei tilsette med teknologi, sa Daria Maria Johnsen (MDG). Ho var vara for Ingrid Kristine Aspli (SV).

Kommunale skåra lågare

Aspli har tidlegare uttalt til Aftenbladet at ho meiner fleire tilsette ved sjukeheimane er det som må til.

Ap hadde ingen innvendingar til fleirtalspartia sine forslag, men meinte det var noko som var enda viktigare.

Undersøkinga viser nemleg at dei kommunale sjukeheimane skårar mellom tre og fem poeng lågare enn dei private sjukeheimane på alle område.

– Når vi går inn i tala, ser vi at der er enkelte ting som ikkje er så bra. Det mest bekymringsfulle, slik vi ser det, er skilnadane mellom dei private og dei kommunale sjukeheimane. Vi vil vite kvifor det er slik. Kva er det dei private får til som dei kommunale ikkje får til? sa Linda Susanne Krüger.

Ap fekk samtlege parti med seg på eit tilleggsforslag som ber rådmannen gjere greie for moglege årsaker til desse skilnadane, sette i gang tiltak som skal minske skilnadane og hente inn erfaring frå andre kommuner.