Lover mange fleire tilsette i barnehage, skule og sjukeheim
STAVANGER: Arbeiderpartiet går til val på eit kostbart program. I utgangspunktet vil dei ikkje auke eigedomskatten, men utelukkar det ikkje.
– Skule, barnehage og eldreomsorg blir våre viktigaste område fram mot valet, saman med arbeidet for å få fleire bedrifter til Stavanger, seier Kari Nessa Nordtun, ordførarkandidat for Nye Stavanger Ap.
Måndag la partiet sin programkomité fram sitt forslag til program som dei ønsker å gå til val på. For første gong gjeld programmet for både Stavanger, Rennesøy og Finnøy samla. Fristen for endringsforslag er 7. november.
Utelukkar ikkje auka skatt Partiet går til val på auka grunnbemanning i både barnehage, skule og sjukeheimar. Dei lover fleire faste heiltidsstillingar i kommunal sektor. Vidare vil dei ha helsesøster til stades på alle skular kvar dag, og skulane skal få fleire tilsette med sosialfagleg bakgrunn.
–Å bruke pengar på å auke grunnbemanninga vil koste, men det kostar også å ha så høgt sjukefråver som Stavanger kommune har i dag, seier Nessa Nordtun.
– Kva vil de velge vekk for å få råd til alt dette?
– Ein del prestisjeprosjekt må vike. Vi går ikkje inn for å kjøpe andelar i Stavanger Forum Expo, og meiner vi må vurdere om slike typer prosjekt kan finansierast på ein annan måte. Folkebadet ligg heller ikkje inne i programforslaget vårt.
Torsdag skreiv Aftenbladet at Ap ønsker å droppe demenslandsbyen ved Ramsvigtunet og heller bygge ny sjukeheim fordi dei meiner planane er for dyre.
–Så har jo Finnøy eit Havbruksfond som fekk utbetalt 46 millionar i år, seier Nessa Nordtun.
– Kor mykje av fondet kan Nye Stavanger rekne med i sine budsjett?
– Det som er sikkert er at fondet vil gå inn i økonomien til kommunen, men det skal seiast at framtida for dette fondet er usikkert. Difor er det ikkje ei inntekt vi kan budsjettere med. Det er ei inntekt vi har no, men kanskje ikkje i framtida.
– Kva med eigedomskatt?
– Vi går ikkje til val på å auke eigedomskatten. Om ein hamnar i ein situasjon som er akutt for skule og eldre og der det er behov for meir pengar, så er eigedomskatt ein måte å finansiere dette på.
– Og om ein hamnar i ein slik akutt situasjon, er det då aktuelt å auke den?
– Då må vi ta ei vurdering på om vi vil auke den. Vi kan ikkje garantere at eigedomskatten ikkje vil bli høgare, men det er det heller ingen parti som kan.
Vil ha mobilfrie skular
Både i skule og barnehage er det frå i haust nye normer for kor mange barn som skal vere per vaksne. Frå før mottar kommunen ein del midlar som følgje av dette. Ap ønsker altså å gå lengre enn dei statlege føringane tvingar kommunen til, men er vage på kor mange fleire pedagogar som skal tilsettast.
– Det er for tidleg å gi eit konkret svar på kor mykje dette vil koste kommunen, men Ap har i sine tidlegare budsjett alltid lagt inn ei auke i skulebudsjettet. I budsjettforslaget for 2018 ønska vi 17,5 millionar meir i direkte rammetilskot til skulane, seier kommunalråd Dag Mossige som sit i kommunalstyret for oppvekst i Stavanger.
– De vil auke grunnbemanninga i barnehagen. Kor mange ekstra tilsette er det snakk om?
– Å auke grunnbemannina handlar om betre kvalitet og betre arbeidsforhold for dei tilsette. Så må vi kome tilbake til kor mykje vi skal legge inn til dette i vårt alternative budsjett. Stavangerbarnehagenes Foreldreforening har argumentert for å ha ein tilsett ekstra på toppen av dei som er i barnehagen. Kanskje er dette ei løysing, seier han.
Ei av sakene som er venta å skape mest diskusjon når partiet skal diskutere programkomiteen sitt forslag, er mobilfri skule. Programkomiteen ønsker at alle barneskular skal vere mobilfrie. Eit mindretal ønsker at også dette også skal gjelde for ungdomsskular.
– Det betyr ikkje at laerarane ikkje skal kunne bestemme at elevane får bruke mobilar når dei meiner det er føremålsteneleg, men at utgangspunktet er at vi vil ha mobilfrie skular, seier Mossige.
For første gong gjeld programmet for både Stavanger, Rennesøy og Finnøy samla.