Bompenge-aksjonist får 25.000 kroner i bot

STAVANGER: Mannen som inntok talarstolen under bystyremøtet førre veke, har fått bot på 25.000 kroner. Politiet meiner handlinga var til hinder for demokratiet.

– Vi ga måndag førelegg, ei bot på 25.000 kroner, til aksjonsleiaren som gjekk opp på talarstolen, seier Sondre Hauge, politiadvokat i SørVest politidistrikt.

Det var måndag for ei veke sidan at bystyremøtet i Stavanger blei avbrote etter at rundt 50 bompenge-demonstrantar gjekk inn i salen. Ein representant for aksjonen inntok talarstolen og blei ståande, til trass for fleire oppfordringar frå ordførar Christine Sagen Helgø og ein vektar om å gå ned att. Då han ikkje stoppa, valde ordføraren å avbryte møtet.

– Han gjekk sjølv opp på talarstolen og blei verande der til trass for at ordførar gjentekne gongar bad han gå ned. Sikta har ved si framferd sett demokratiet til sides ved å hindre bystyret i å utføre si demokratiske plikt. Dette er ei sak som har vekt stort engasjement, og vi meiner demonstrantane har fått kome til orde i aksjonar, til dømes køyre-sakte demonstrasjonar i samråd med politiet. Men no gjekk dei over grensa for ytringsfridommen og over i det straffbare, seier Hauge.

– De har valt å ikkje gi bot til dei andre demonstrantane. Kor går grensa?

– Nøyaktig kor grensa går, har vi ikkje tatt stilling til. Det var avgjerande at sikta fekk fleire moglegheiter gjennom gjentekne beskjedar om å gå ned frå talarstolen.

Ville melde seg sjølv Ordføraren varsla i ettertid av hendinga at Stavanger kommune kom til å melde hendinga til politiet. Og Aftenbladet er kjent med at i alle fall éin demonstrant på Facebook skriv at ho ville melde seg sjølv. Onsdag førre veke var det politiet som sjølv oppretta sak på hendinga.

Aftenbladet har ikkje måndag lukkast med å få ein kommentar frå demonstranten. Førre veke uttalte han følgjande til Aftenbladet:

– Vi kjem ikkje gjennom med bodskapen vår. Vi taler for døve øyrer. Folk er fortvila og ønsker å bli sett og høyrt. Dråpen var kanskje då vi inviterte alle partia i fylkestinget til ei utspørring på Arneageren om bomringane. Kun to parti, Frp og MDG, stilte opp. Då er det ikkje mykje rom for dialog, sa han.

Han gjekk med på at aksjonsforma kanskje var noko på kanten, men meiner framleis at handlinga er innanfor.

– Vi angrar ikkje på noko, og det kjem fleire aksjonar etter denne, sa han.

STEIN HALVOR JUPSKÅS Rundt 50 demonstrantar frå Nok er Nok-aksjonen overtok bystyremøtet i Stavanger førre veke. No har ein av demonstrantane mottatt bot.