Nok er nok vil ikkje lenger samarbeide med politiet
STAVANGER: Bomaksjonisten som inntok talarstolen i Stavanger bystyre, har ikkje bestemt seg for om han vil godta førelegget frå politiet. Nok er nok vil ikkje lenger samarbeide med politiet.
Måndag opplyste Sør-Vest politidistrikt at bompengeaksjonisten som førre veke inntok talarstolen i Stavanger bystyre, har fått ei bot på 25.000 kroner.Mannen gjekk opp på talarstolen og nekta å gå ned, til trass for fleire oppfordringar frå ordførar Christine Sagen Helgø og ein vektar. Då han ikkje stoppa, valde ordføraren å avbryte møtet. Rundt 50 personar deltok i aksjonen.
Bryt samarbeid med politiet Jan Ove Sikveland, aksjonisten som inntok talarstolen, uttalte på ein pressekonferanse tysdag at han gjorde det han følte var riktig i situasjonen. Han har ikkje vedtatt førelegget. Vel han å ikkje godta det, er neste steg at saka blir tatt opp i ei hovudforhandling i Stavanger tingrett. Og om han godtar bota, varslar aksjonsgruppa at det blir sett i gang ei kronerulling.
– Vi har fram til i dag hatt eit samarbeid med ein etat i politiet, og vil inntil vidare bryte alt samarbeid. Eit førelegg på 25.000 kroner oppfattar vi som hinsides all sunn fornuft, og kan ikkje anna enn å oppfatte det som eit forsøk på å kneble oss for vidare ytringar framover, sa Alexandra Eva Lind i Nok er Nok under pressekonferansen tysdag.
– Fredeleg aksjon
– Tanken vår var at når politikarane ikkje vil møte folket, så møter folket politikarane. Sikveland spurte ordføraren om han kunne få seie nokre ord, noko ordføraren ikkje tillot. Etter at ordføraren tok ei pause i bystyret, roa Sikveland aksjonistane og sa nokre ord frå talarstolen, sa Lind.
Ho omtala hendinga i bystyresalen som ein fredeleg aksjon:
– Ingen politikarar blei truga, og det gjekk ei stund før politikarane merka at det kom folk inn i salen i det heile tatt, sa ho.
– Dei som måtte tru at dette førelegget vil stoppe oss, anten det er politikarar eller politiet, tar veldig feil. Dette gir oss berre enda meir energi. Vi kjem til å trappe opp kampen mot den usosiale bymiljøpakken.
Sondre Hauge, politiadvokat i Sør-Vest politidistrikt, uttalte måndag at politiet meiner sikta har sett demokratiet til sides ved å hindre bystyret i å utføre si demokratiske plikt.
– Dette er ei sak som har vekt stort engasjement, og vi meiner demonstrantane har fått kome til orde i aksjonar, til dømes køyre-sakte demonstrasjonar i samråd med politiet. Men no gjekk dei over grensa for ytringsfridommen og over i det straffbare, sa han.