Nylund-elevar får støtte frå politikarar om gulfargen
STAVANGER: Tre jenter ved Nylund skole har starta underskriftskampanje for å hindre at skulen mister gulfargen sin.
Per A. Thorbjørnsen (V) håper administrasjonen lyttar til elevane.
Liv Tjelta Thorshaug (11), Mille Eia Richter (10) og Helene Gabrielle Van Blaricum (11) synest det er trist at Nylund skole mister gulfargen sin.
I løpet av 2019 skal det lysegule bygget bli heilt grått, og kommunen har allereie malt den første veggen. Sjetteklassejentene har starta underskriftskampanje for å stoppe dette, og har i løpet av første veka fått inn rundt hundre underskrifter.
Vil lytte til elevane Administrasjonen i Stavanger kommune fremjar ei sak om prosjektet på møtet i kommunalstyret for miljø og utbygging (KMU) 20. november. Då skal politikarane behandle andre byggefase i restaureringa av skulen, med oppstilling av kostnader etter anbodsrunda.
–Det er eit flott initiativ og klar melding frå elevane. Elevane sitt krav verkar gjennomtenkt, seier Per A. Thorbjørnsen (V), leiar i KMU.
– Dette ønsker eg skal løysast administrativt og så raskt som mogleg. Når elevar har sterke meiningar om fargebruk skal vi lytte til det. Det er elevane som går der kvar dag og må forhalde seg til det, ikkje byråkratane, seier han.
Kommunen var nøydd å gjere noko med det gamle bygget. Hadde dei ikkje pussa vekk den gamle malinga og malt på ny, var risikoen stor for at det utvikla seg fuktproblem, ifølgje prosjektleiar i Stavanger Eiendom, Britta Goldberg.
Dermed blei val av farge eit tema. Både gult og grått blei vurdert, men byantikvar Hanne Windsholt uttalte fredag at det historiske aspektet var ein viktig del av vurderinga. Aftenbladet sitt arkiv viser at Nylund skole i alle fall var grå til 1988.
– Storhaug treng farge
Per A. Thorbjønsen meiner gult er ein betre farge for skulebygget. – Storhaug treng farge. Eg ser ikkje heilt for meg at vi skal stemme over grått eller gult i kommunalstyret, så her håper eg rådmannen tar signala. Det å bli verkeleg lytta til er dessutan ei god demokratioppleving for elevane, seier han.
– Vi vil helst ikkje endre planen, men eg vil heller ikkje avfeie at det kan vere mogleg, sa Britta Goldberg, prosjektleiar i Stavanger Eiendom, til Aftenbladet fredag. Søndag seier ho at dei vil diskutere dette med byantikvar Hanne Windsholt, og at dei tar elevane sitt initiativ til etterretning. Fleire politikarar har uttrykt støtte til elevane. Blant anna har Ingebjørg Folgerø (H), Rune Askeland (MDG) og dei to Ap-politikarane Øyvind Jacobsen og Dag Mossige.