Elevane får politikarane si støtte
Tre jenter ved Nylund skole har starta underskriftskampanje for å hindre at skulen mister gulfargen sin. Per A. Thorbjørnsen (V) håper administrasjonen lyttar til elevane.
Liv Tjelta Thorshaug (11), Mille Eia Richter (10) og Helene Gabrielle Van Blaricum (11) synest det er trist at Nylund skole mister gulfargen sin.
I løpet av 2019 skal det lysegule bygget vere heilt grått, og kommunen har allereie malt den første veggen. Sjetteklasse-jentene har starta underskriftskampanje for å stoppe dette, og har i løpet av første veka fått inn rundt hundre underskrifter.
Administrasjonen i Stavanger kommune fremjar ei sak om prosjektet på møtet i kommunalstyret for miljø og utbygging (KMU) 20. november. Då skal politikarane behandle andre byggefase i restaureringa av skulen, med oppstilling av kostnader etter anbodsrunda.
– Når elevar har sterke meiningar om fargebruk skal vi lytte til det. Det er elevane som går der kvar dag og må forhalde seg til det, ikkje byråkratane, seier Per A. Thorbjørnsen (Venstre), leiar i KMU.
Fleire politikarar har i sosiale medium og i saka sitt kommentarfelt uttrykt støtte til elevane. Blant anna har Ingebjørg Folgerø (Høgre) varsla at ho vil sørge for at dette blir tema i neste KMUmøte. Også Rune Askeland (MDG) samt dei to Ap-politikarane Øyvind Jacobsen og Dag Mossige, skriv at skulen bør forbli gul.