Mor Bettina Lindgren får behalde pleiepengar for sine sjuke barn
PLEIEPENGAR: Måndag blei det fleirtal i Stortinget for ei endring som får mykje å seie for Bettina Lindgren. Ho er mor til tre alvorleg sjuke barn.
For eit år sidan kom ei regelendring som gjorde at foreldre som er heime og pleier alvorleg sjuke barn, får mindre økonomisk støtte.
Blant anna blei det innført ei tidsgrense som seier at ein ikkje får pleiepengar for meir enn 1300 dagar per barn, altså i underkant av fire år.
Måndag gjekk KrF, Ap, SV og Senterpartiet i Stortinget saman om å fjerne tidsgrensa.
– Usikre på huset
– Eg er glad eg slepp å tenke på tidsgrensa og veldig nøgd med at dette blir fjerna. Men det har litt bismak. Vi skulle gjerne sett at det var meir som blei gjort om på, seier Bettina Lindgren frå Tananger.
Ho er mor til tre alvorleg sjuke barn og er ein av mødrene i Pleiepengeaksjonen. I tillegg til tidsgrensa, jobbar dei for ei endring i graderingsregelen. Den seier at dersom ungen kan vere i barnehage eller skule, så blir pleiepengane kutta for desse timane. Dette valde fleirtalet i Stortinget å halde på.
– Eg får dagleg melding frå foreldre som er usikre på om dei må selge hus, som må ta søsken ut frå fritidsaktivitetar eller som må ta opp forbrukslån for å berge økonomien. Graderingsregelen har mykje å seie for desse.
– Det er sjukt å seie det, men eg er på ein måte «heldig» som har tre sjuke born fordi det gjer at eg samla mottar hundre prosent pleiepengar. Men for mange har graderings-reglane store konsekvensar.
Eirik Faret Sakariassen (SV) meiner ein med dagens system lager ei fattigdomsfelle.
– Enkelte foreldre kan kanskje gå ut i jobb desse timane, men mange klarer ikkje dette. Dei er utslitne fordi dei har vore oppe heile natta med sjuke barn. Straffar vi dei for dette, lagar vi ei fattigdomsfelle.
Dobbelt så mange får
Då Aftenbladet skreiv om innføring av gradering og tidsgrense for eit år sidan, argumenterte helse- og omsorgsminister Bent Høie (H) med at endringa fører til at nesten dobbelt så mange vil få rett på denne økonomiske støtta.
– Før var det mange familier som ikkje fekk pleiepengar, eller som gjekk inn og ut av ordninga på grunn av dei strenge reglene. No vil mange fleire familier få rett til pleiepengar, sa han.
Han meinte vidare at ein må sjå ordninga i samanheng med andre stønader frå folketrygda og kommunale tilbod, til dømes omsorgsløn.
– Pleiepengar er ein midlertidig inntektserstatning for yrkesaktive som er borte frå arbeidet for å pleie sjuke barn. Det er med andre ord ikkje ei betaling for foreldre for å utføre pleieoppgåver.
Eg er glad eg slepp å tenke på tidsgrensa og veldig nøgd med at dette blir fjerna.
Bettina Lindgren, mor til tre alvorleg sjuke barn